(تصديقِ غيبى مجموعهسندن بر مكتوب)
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلرم!
سزه درت مسئلهيى بيان ايتمك قلبمه إخطار ايديلدى:
برنجيسى:
هم لسانِ حال، هم لسانِ قال ايله و باشقه تظاهراتلرله صوريلان بر سؤاله جوابدر.
دينيلييور كه: مادام رسالۀِ نور هم كرامتليدر، هم طريقتلردن زياده ايمان حقيقتلرينڭ إنكشافنده ترقّى ويرييور و صادق شاكردلرى قسمًا بر جهتده ولايت درجهسندهلر. نهدن أوليالر گبى معنوى ذوقلر و كشفياتلره و مادّى كرامتلره مظهريتلرى گورولمييور؛ هم اونڭ طلبهلرى ده اويله شيلر آرامييورلر. بونڭ حكمتى نهدر؟
الجواب: أوّلا: سببى، سرِّ إخلاصدر. چونكه دنياده موقّت ذوقلر، كرامتلر تام نفسنى مغلوب ايتمهين إنسانلره بر مقصد اولوب، اُخروى عملنه بر سبب تشكيل ايدر، إخلاصى قيريلير. چونكه عملِ اُخروى ايله دنيوى مقصدلر، ذوقلر آرانيلماز. آرانيلسه سرِّ إخلاصى بوزار.
ثانيًا: كرامتلر، كشفياتلر، طريقتده سلوك ايدن عامى و يالڭز ايمانى تقليدى بولونان و تحقيق درجهسنه گيرمهينلره، بعضًا ضعيف اولانلرى تقويه و وسوسهلى شبههليلره قناعت ويرمك ايچوندر. حالبوكه رسالۀِ نورڭ ايمانى حقيقتلرينه گوسترديگى حجّتلر، هيچ بر جهتده وسوسهلره ميدان ويرمديگى گبى، قناعت ويرمك جهتنده كرامتلره، كشفياتلره هيچ إحتياج بيراقمييور. اونڭ ويرديگى ايمانِ تحقيقى، كشفيات، ذوقلر و كرامتلرڭ چوق فوقنده اولماسندن، حقيقى شاكردلرى اويله كرامت گبى شيلرى آرامييورلر.
ثالثًا: رسالۀِ نورڭ بر أساسى، قصورينى بيلمكله محويتكارانه يالڭز رضاءِ إلٰهى ايچون رقابتسز خدمت ايتمكدر. حالبوكه كرامت صاحبلرى و كشفياتدن ذوقلهنن أهلِ طريقتڭ مابيْنندهكى إختلاف و بر نوع رقابت و بو أنانيت زماننده أهلِ غفلتڭ نظرنده اونلره سوءِ ظن ايدوب او مبارك ذاتلرى، بنلك و أنانيتله إتهام ايتمهلرى گوسترييور كه؛ رسالۀِ نورڭ شاكردلرى شخصى ايچون كرامت و كشفياتلر ايستهمهمك، پشنده قوشمامق لازم و ألزمدر. هم اونڭ مسلگنده شخصه أهمّيت ويريلمييور. شركتِ معنويه و قارداشلر بربرنده تفانى نقطهسنده رسالۀِ نورڭ مظهر اولديغى بيڭلر كرامتِ علميه و إنتشارِ خدمتدهكى تسهيلات و چاليشانلرڭ معيشتندهكى بركت گبى إكراماتِ إلٰهيه عمومه كافى گلير؛ داها باشقه شخصى كمالات و كرامتى آرامييورلر.
رابعًا: دنيانڭ يوز باغچهسى، فانى اولمق حيثيتيله آخرتڭ باقى اولان بر آغاجنه مقابل گلهمز. حالبوكه حاضر لذّته مفتون كور حسّياتِ إنسانيه فانى حاضر بر ميوهيى، باقى اُخروى بر باغچهيه ترجيح ايتمك جهتيله، نفسِ أمّاره بو حالتِ فطريهدن إستفاده ايتمهمك ايچون رسالۀِ نور شاكردلرى أذواقِ روحانيهيى و كشفياتِ معنويهيى دنياده آرامييورلر.
رسالۀِ نور شاكردلرينه بو نقطهده بڭزهين أسكيدن بر ذات، حرميله برابر بيوك بر مقامده بولوندقلرى حالده، معيشت مضايقهسى يوزندن حرمى ديمش زوجنه: «إحتياجمز شديددر.» بردن، آلتوندن بر كرپيج يانلرنده حاضر اولدى. حرمنه ديدى: «ايشته جنّتدهكى بزم قصريمزڭ بر كرپيجيدر.» بردن او مبارك خانم ديمش كه: «گرچه چوق محتاجز و آخرتده ده چوق بويله كرپيجلريمز وار؛ فقط فانى بر صورتده بو ضايع اولماسين، او قصريمزدن بر كرپيج نقصان اولماسين. دعا ايت، يرينه گيتسين؛ بزه لازم دگل.» بردن يرينه گيتدى. كشف ايله گورديلر دييه روايت ايديلمش.
ايشته بو ايكى قهرمان أهلِ حقيقت، رسالۀِ نور شاكردلرينڭ دنيايه عائد أذواق كرامتلره قوشمادقلرينه بر حسنِ مثالدر.
* * *