بر دستور
رسالۀِ نور طلبهلرى، رسالۀِ نورڭ دائرهسى خارجنده نور آراماملى و آراماز. أگر آراسه رسالۀِ نورڭ پنجرهسندن ايشيق ويرن معنوى گونشه بدل، بر لامبايى بولور بلكه گونشى غيب ايدر.
هم رسالۀِ نورڭ دائرهسندهكى خالص و پك قوّتلى، چوق روحلرى هر فردينه قزانديران و صحابهنڭ سرِّ وراثتِ نبوّتله مشربِ اخوّتكارانهسنى گوسترن مشربِ خلّت و مسلكِ اخوّت ايسه خارج دائرهلرده -و او پدر و او مرشد اوچ جهتله ضرر ويرمك صورتيله- بر پدرى آرامغه إحتياج بيراقماز. بر تك پدر يرينه پك چوق آغابگى بولديرر. ألبته بيوك قارداشلرڭ متعدّد شفقتلرى، بر پدرڭ شفقتنى هيچه اينديرر. دائرهيه گيرمهدن أوّل بولديغى مرشدى، هر فرد دائرهده دخى محافظه ايدهبيلير. فقط مرشدى اولميان، دائرهيه گيردكدن صوڭره آنجق دائره ايچنده مرشد آرايهبيلير.
هم رسالۀِ نورڭ ولايتِ كبرادن اولان سرِّ وراثتِ نبوّت فيضنى ويرن درسِ حقائق دائرهسندهكى علمِ حقيقت دخى دائره خارجندهكى طريقتلره إحتياج بيراقماز. مگر طريقتى ياڭليش آڭلايوب گوزل رؤيالر، خياللر، نورلره و ذوقلره مبتلا و آخرت فضيلتندن آيرى اولان دنيوى و هوسى ذوقلرى آرزولايان و مرجعيت مقامنى ايستهين نفسپرستلر اوله.
بو دنيا دار الخدمتدر. كلفت و مشقّتله اجرت ئولچولور. دار المكافات دگل. اونڭ ايچوندر كه أهلِ حقيقت كشف و كرامتدهكى أذواق و أنواره أهمّيت ويرمييورلر. بعضًا قاچييورلر، سترينى ايستهيورلر.
رسالۀِ نور دائرهسى گنيشدر، شاكردلرى پك چوقدر. خارجه قاچانلرى آراماز، أهمّيت ويرمز بلكه داها ايچنه آلماز. هر إنسانده بر قلپ وار. بر قلپ هم دائرهده هم خارجده اولاماز.
هم خارجدهكى إرشاده هوسلى ذاتلر، رسالۀِ نور شاكردلريله مشغول اولماملى. چونكه اوچ جهتله ضرر گورمهلرى محتملدر. تقوا دائرهسندهكى طلبهلر إرشاده محتاج اولمادقلرى گبى خارجده كثرتلى نمازسز وار؛ اونلرى بيراقوب بونلرله مشغول اولمق، إرشاد دگلدر. أگر بو شاكردلرى سَورسه أوّلا دائره ايچنه گيرسين؛ او شاكردلره پدر دگل بلكه قارداش اولسون، فضيلتى زياده ايسه آغابگلرى اولسون.
هم بو حادثهده گورونديگى گبى رسالۀِ نوره إنتسابڭ چوق أهمّيتى وار و چوق بهالى دوشدى. و بوڭا بو فيآتى ويرن و او يولده بتون عالمِ إسلام نامنه دينسزلگه قارشى مجاهد وضعيتنى آلان عقلى باشنده بر آدم، او ألماس گبى مسلگنى ترك ايدوب باشقه مسلكلره گيرمز.
* * *
(تصديقِ غيبى مجموعهسندهكى بر مكتوبڭ بر پارچهسيدر.)
مباركلرڭ پهلوانى هم عبد الرحمن، هم لطفى، هم بيوك حافظ على معنالرينى طاشييان بيوك روحلى كوچك على قارداشمز بر سؤال صورويور. حالبوكه او سؤالڭ جوابى رسالۀِ نورده يوز يرده وار. «رسالۀِ نورڭ أركانِ ايمانيه حقّنده بو درجه كثرتلى تحشيداتى نه ايچوندر؟ بر اُمّى مؤمنڭ ايمانى بيوك بر ولينڭ ايمانى گبيدر، دييه أسكى خواجهلر بزه درس ويرمشلر؟» دييور.
الجواب: باشده آيت الكبرا مراتبِ ايمانيه بحثلرنده و آخره ياقين مجدّدِ ألفِ ثانى إمامِ ربّانىنڭ بيانى و حكمى كه: «بتون طريقتلرڭ منتهاسى و أڭ بيوك مقصدلرى، حقائقِ ايمانيهنڭ إنكشافيدر. و بر مسئلۀِ ايمانيهنڭ قطعيتله وضوحى، بيڭ كرامتلردن و كشفياتلردن داها اييدر.» و آيت الكبرانڭ أڭ آخردهكى و لاحقهدن آلينان او مكتوبڭ پارچهسى و تمامنڭ بياناتى جواب اولديغى گبى، ميوه رسالهسنڭ تكراراتِ قرآنيه حقّنده اوننجى مسئلهسى، توحيد و ايمان ركنلرى حقّنده تكرارلى و كثرتلى تحشيداتِ قرآنيهنڭ حكمتى، عينًا بِتَمَامِهَا اونڭ حقيقى تفسيرى اولان رسالۀِ نورده جريان ايتمهسى ده جوابدر.
هم ايمانڭ تحقيقى و تقليدى و إجمالى و تفصيلى قسملرى بولونديغى و ايمانڭ بتون تهاجماته و وسوسهلر و شبههلره قارشى طايانوب صارصيلمامسنى بيان ايدن رسالۀِ نور پارچهلرينڭ ايضاحاتى، بيوك روحلى كوچك علىنڭ مكتوبنه اويله بر جوابدر كه، بزه هيچ بر إحتياج بيراقمييور.
ايكنجى جهت: ايمان، يالڭز إجمالى و تقليدى بر تصديقه منحصر دگل. بر چكردكدن، تا بيوك خرما آغاجنه قدر و ألدهكى آيينهده گورونن مثالى گونشدن تا دڭز يوزندهكى عكسنه، تا گونشه قدر مرتبهلرى و إنكشافلرى اولديغى گبى؛ ايمانڭ او درجه كثرتلى حقيقتلرى وار كه، بيڭ بر أسماءِ إلٰهيه و سائر أركانِ ايمانيهنڭ كائنات حقيقتلريله علاقهدار چوق حقيقتلرى وار كه: «بتون علملرڭ و معرفتلرڭ و كمالاتِ إنسانيهنڭ أڭ بيوگى ايماندر و ايمانِ تحقيقيدن گلن تفصيللى و برهانلى معرفتِ قدسيهدر» دييه أهلِ حقيقت إتّفاق ايتمشلر.
أوت ايمانِ تقليدى، چابوق شبههلره مغلوب اولور. اوندن چوق قوّتلى و چوق گنيش اولان ايمانِ تحقيقيده پك چوق مراتب وار. او مراتبلردن علم اليقين مرتبهسى، چوق برهانلرينڭ قوّتلريله بيڭلر شبههلره قارشى طايانير. حالبوكه تقليدى ايسه بر شبههيه قارشى بعضًا مغلوب اولور.
هم ايمانِ تحقيقينڭ بر مرتبهسى ده عين اليقين درجهسيدر كه، پك چوق مرتبهلرى وار. بلكه أسماءِ إلٰهيه عددنجه تظاهر درجهلرى وار. بتون كائناتى بر قرآن گبى اوقويهبيلهجك درجهسنه گلير.
هم بر مرتبهسى ده حقّ اليقيندر. اونڭ ده چوق مرتبهلرى وار. بويله ايمانلى ذاتلره شبهات اوردولرى هجوم ده ايتسه، بر خلط ايدهمز.
و علماءِ علمِ كلامڭ بيڭلر جلد كتابلرى، عقله و منطغه إستنادًا تأليف ايديلوب، يالڭز او معرفتِ ايمانيهنڭ برهانلى و عقلى بر يولنى گوسترمشلر. و أهلِ حقيقتڭ يوزر كتابلرى كشفه، ذوقه إستنادًا او معرفتِ ايمانيهيى داها باشقه بر جهتده إظهار ايتمشلر. فقط قرآنڭ معجزهكار جادّۀِ كبراسى، گوسترديگى حقائقِ ايمانيه و معرفتِ قدسيه؛ او علما و أوليانڭ پك چوق فوقنده بر قوّت و يوكسكلكدهدر.
ايشته رسالۀِ نور بو جامع و كلّى و يوكسك معرفت جادّهسنى تفسير ايدوب، بيڭ سنهدن بَرى قرآن عليهنه و إسلاميت و إنسانيت ضررينه و عدم عالملرى حسابنه تخريباتجى كلّى جريانلره قارشى قرآن و ايمان نامنه مقابله ايدييور، مدافعه ايدييور. ألبته حدسز تحشيداته إحتياجى واردر كه، او حدسز دشمنلره قارشى طايانوب أهلِ ايمانڭ ايماننى محافظهسنه قرآن نوريله وسيله اولسون.
حديثِ شريفده واردر كه: «بر آدمڭ سنڭله ايمانه گلمهسى، سڭا صحرا طولوسى قيرمزى قويونلردن داها خيرليدر.» «بعضًا بر ساعت تفكّر، بر سنه عبادتدن داها خيرلى اولور.» حتّى نقشيلرڭ خفى ذكره ويرديگى بيوك أهمّيت، بو نوع تفكّره يتيشمك ايچوندر.
عموم قارداشلريمزه برر برر سلام و دعا ايدييورز.
اَلْبَاقِى هُوَ الْبَاقِى
سعيد النورسى
* * *
قارداشلرم! قلبمه إخطار ايديلدى كه: ناصل كه مثنوئِ شريف، شمسِ قرآندن تظاهر ايدن يدى حقيقتدن بر حقيقتنڭ آيينهسى اولمش، قدسى بر شرف آلمش؛ مولويلردن باشقه داها چوق أهلِ قلبڭ لا يموت بر مرشدى اولمش.
اويله ده رسالۀِ نور، شمسِ قرآنيهنڭ ضياسندهكى ألوانِ سبعهيى و او گونشدهكى رنك رنك، چشيد چشيد يدى نورى بردن آيينهسنده تمثّل ايتديرديگندن، إن شاء اللّٰه يدى جهتله شريف و قدسى و يدى مثنوى قدر أهلِ حقيقته باقى بر رهبر و مرشد اولاجق
* * *
بر سؤاله جواب اولارق يازديغم بر فقرهيى، سزه ده فائدهسى اولور إحتماليله بيان ايدييورم:
أوليا ديوانلرينى و علمانڭ كتابلرينى چوق مطالعه ايدن بر قسم ذاتلر طرفلرندن صورولدى: «رسالۀِ النورڭ ويرديگى ذوق و شوق و ايمان و إذعان اونلردن چوق قوّتلى اولماسنڭ سببى نهدر؟»
الجواب: أسكى مبارك ذاتلرڭ أكثر ديوانلرى و علمانڭ بر قسم رسالهلرى ايمانڭ و معرفتڭ نتيجهلرندن و ميوهلرندن و فيضلرندن بحث ايدرلر. اونلرڭ زمانلرنده ايمانڭ أساساتنه و كوكلرينه هجوم يوقدى و أركانِ ايمان صارصيلمايوردى.
شيمدى ايسه كوكلرينه و أركاننه شدّتلى و جماعتلى بر صورتده تعرّض وار. او ديوانلر و رسالهلرڭ چوغى خاص مؤمنلره و فردلره خطاب ايدرلر، بو زمانڭ شدّتلى تعرّضنى دفع ايدهمييورلر.
رسالۀِ نور ايسه، قرآنڭ بر معنوى معجزهسى اولارق ايمانڭ أساساتنى قورتارييور و موجود و محكم ايماندن إستفاده جهتنه دگل، بلكه چوق دليللر و پارلاق برهانلر ايله ايمانڭ إثباتنه و تحقّقنه و محافظهسنه و شبهاتدن قورتارمسنه خدمت ايتديگندن؛ هركسه بو زمانده أكمك گبى، علاج گبى لزومى وار اولديغنى دقّتله باقانلر حكم ايدييورلر.
او ديوانلر ديرلر كه: «ولى اول، گور؛ مقاماته چيق، باق؛ نورلرى، فيضلرى آل.»
رسالۀِ نور ايسه دير: «هر كيم اولورسهڭ اول؛ باق، گور، يالڭز گوزيڭى آچ، حقيقتى مشاهده ايت، سعادتِ أبديهنڭ آناختارى اولان ايمانڭى قورتار.»
هم رسالۀِ النور، أڭ أوّل ترجماننڭ نفسنى إقناعه چاليشير، صوڭره باشقهلره باقار. ألبته نفسِ أمّارهسنى تام إقناع ايدن و وسوسهسنى تمامًا إزاله ايدن بر درس، غايت قوّتلى و خالصدر كه، بو زمانده جماعت شكلنه گيرمش دهشتلى بر شخصِ معنوئِ ضلالت قارشيسنده تك باشيله غالبانه مقابله ايدر.
هم رسالة النور، سائر علمانڭ أثرلرى گبى، يالڭز عقلڭ آياغى و نظريله درس ويرمييور و أوليا مِثللو يالڭز قلبڭ كشف و ذوقيله حركت ايتمييور؛ بلكه عقل و قلبڭ إتّحاد و إمتزاجى و روح وسائر لطائفڭ تعاونى آياغيله حركت ايدهرك اَوْجِ أعلايه اوچار؛ تعرّض ايدن فلسفهنڭ دگل آياغى، بلكه گوزى يتيشهمديگى يرلره چيقار؛ حقائقِ ايمانيهيى كور گوزينه ده گوسترر.
* * *
(بديع الزمانڭ إعاشهسى و گچيمى حقّنده أهلِ دنيانڭ سؤالى)
سؤال: أهلِ دنيا بڭا دير: «نه ايله ياشايورسڭ؟ چاليشمهدن ناصل گچينييورسڭ؟ مملكتمزده تنبلجه اوطورانلرى و باشقهسنڭ سعيى ايله گچيننلرى ايستهمييورز.»
الجواب: بن إقتصاد و بركتله ياشايورم. رزّاقمدن باشقه كيمسهنڭ منّتنى آلمايورم و آلمامغه ده قرار ويرمشم. أوت گونده يوز پاره، بلكه قرق پاره ايله ياشايان بر آدم، باشقهسنڭ منّتنى آلماز. شو مسئلهنڭ ايضاحنى هيچ آرزو ايتمييوردم. بلكه بر غرورى و بر أنانيتى إحساس ايدر فكريله، بيان ايتمك بڭا پك ناخوشدر. فقط مادام أهلِ دنيا أوهاملى بر صورتده صورييورلر، بن ده ديرم كه:
كوچكلگمدن بَرى خلقلرڭ مالنى قبول ايتمهمك (وَلَوْ زكات دخى اولسه) هم معاشى قبول ايتمهمك (يالڭز بر ايكى سنه دار الحكمة الإسلاميهده دوستلريمڭ إجباريله قبول ايتمگه مجبور اولدم و او پارهيى ده معنًا ملّته إعاده ايتدك) هم معيشتِ دنيويه ايچون منّت آلتنه گيرمهمك، بتون عمرمده بر دستورِ حياتمدر. أهلِ مملكتم و باشقه يرلرده بنى طانييانلر بونى بيلييورلر. بو بش سنهكى نفيمده، چوق دوستلر بڭا هديهلرينى قبول ايتديرمك ايچون چوق چاليشديلر، قبول ايتمدم.
«اويله ايسه ناصل إداره ايدرسڭ؟» دينيلسه، ديرم:
بركت و إكرامِ إلٰهى ايله ياشايورم. نفسم چندان هر حقارته، هر إهانته مستحق ايسه ده؛ فقط قرآن خدمتنڭ كرامتى اولارق، أرزاق خصوصنده إكرامِ إلٰهى اولان بركته مظهر اولويورم.
﴿وَاَمَّا بِنِعْمَةِ رَبِّكَ فَحَدِّثْ﴾
سرّيله، جنابِ حقّڭ بڭا ايتديگى إحساناتى ياد ايدوب، بر شكرِ معنوى نوعنده بر قاچ نمونهسنى سويلهيهجگم. بر شكرِ معنوى اولمقله برابر، قورقويورم كه، بر ريا و غرورى إحساس ايدهرك او مبارك بركت كسيلسين. چونكه مفتخرانه گيزلى بركتى إظهار ايتمك، كسيلمهسنه سبب اولور. فقط نه چاره، سويلهمگه مجبور اولدم.
ايشته بريسى: شو آلتى آيدر اوتوز آلتى أكمكدن عبارت بر كيله بغداى بڭا كافى گلدى. داها وار، بيتمهمش. نه مقدار كفايت (حاشيه) ايدهجك، بيلمييورم.
___
(حاشيه): بر سنه دوام ايتدى.
___
ايكنجيسى: شو مبارك رمضانده، يالڭز ايكى خانهدن بڭا يمك گلدى، ايكيسى ده بنى خسته ايتدى. آڭلادم كه، باشقهسنڭ يمگنى يمكدن ممنوعم. متباقيسى، بتون رمضانده بنم إدارهمه باقان مبارك بر خانهنڭ و صادق بر آرقداشم اولان او خانه صاحبى عبد اللّٰه چاوشڭ إخبارى و شهادتيله؛ اوچ أكمك، بر قِيّه (كيلو ديمك) پرنج بڭا كافى گلمشدر. حتّى او پرنج، اون بش گون رمضاندن صوڭره بيتمشدر.
اوچنجيسى: طاغده، اوچ آى بڭا و مسافرلريمه بر قِيّه ترهياغى، (هر گون أكمكله برابر يمك شرطيله) كافى گلدى. حتّى سليمان إسمنده مبارك بر مسافرم واردى. بنم أكمگم ده و اونڭ أكمگى ده بيتييوردى. جهارشنبه گونى ايدى؛ ديدم اوڭا: گيت أكمك گتير. ايكى ساعت، هر طرفمزده كيمسه يوق كه، اورادن أكمك آلينسين. «جمعه گيجهسى سنڭ يانڭده بو طاغده برابر دعا ايتمك آرزو ايدييورم» ديدى. بن ده ديدم: «تَوَكَّلْنَا على اللّٰه، قال.»
صوڭره هيچ مناسبتى اولماديغى حالده و بر بهانه يوقكن، ايكيمز يورىيه يورىيه بر طاغڭ تپهسنه چيقدق. إبريقده بر پارچه صو واردى. بر پارچه شكر ايله چايمز واردى. ديدم: «قارداشم، بر پارچه چاى ياپ.» او اوڭا باشلادى، بن ده درين بر درهيه باقار بر قطران آغاجى آلتنده اوطوردم. متأسّفانه شويله دوشوندم كه: كوفلنمش بر پارچه أكمگمز وار؛ بو آقشام آنجق ايكيمزه يتر. ايكى گون ناصل ياپاجغز و بو صافىقلب آدمه نه دييهجگم؟ دييه دوشونمهده ايكن، بردن بره باشم چوريلير گبى باشمى چويردم؛ گوردم كه: قوجه بر أكمك، قطران آغاجنڭ اوستنده، داللرى ايچنده بزه باقييور. ديدم: «سليمان مژده! جنابِ حق بزه رزق ويردى.» او أكمگى آلدق؛ باقييورز كه، قوشلر و حيواناتِ وحشيه هيچ برى ايليشمهمش. يگرمى اوتوز گوندر هيچ بر إنسان او تپهيه چيقمامشدى. او أكمك، ايكيمزه ايكى گون كافى گلدى. بز ييركن، بيتمك اوزره ايكن، درت سنه صادق بر صدّيقم اولان مستقيم سليمان، أكمكله آشاغيدن چيقهگلدى.
دردنجيسى: شو اوستمدهكى ساقويى، يدى سنه أوّل، أسكى اولارق آلمشدم. بش سنهدر ألبسه، چماشير، پاپوچ، چوراب ايچون درت بچق ليرا ايله إداره ايتدم. بركت إقتصاد و رحمتِ إلٰهيه بڭا كافى گلدى.
ايشته شو نمونهلر گبى چوق شيلر وار و بركتِ إلٰهيهنڭ چوق جهتلرى وار. بو كوى خلقى چوغنى بيليرلر. فقط صاقين بونلرى فخر ايچون ذكر ايدييورم ظن ايتمهيڭز، بلكه مجبور اولدم. هم بنم ايچون اييلگه بر مدار اولديغنى دوشونمهيڭز. بو بركتلر، يا يانمه گلن خالص دوستلريمه إحساندر ويا خدمتِ قرآنيهيه بر إكرامدر ويا إقتصادڭ بركتلى بر منفعتيدر وياخود «يا رحيم، يا رحيم» ايله ذكر ايدن و يانمده بولونان درت كدينڭ رزقلريدر كه، بركت صورتنده گلير، بن ده اوندن إستفاده ايدرم. أوت حزين ميرميرلرينى دقّتله ديڭلهسهڭ، «يا رحيم، يا رحيم» چكدكلرينى آڭلارسڭ.
كدى بحثى گلدى، طاووغى خاطره گتيردى. بر طاووغم وار. شو قيشده، يمورطه ماكينهسى گبى پك آز فاصله ايله هر گون رحمت خزينهسندن بڭا بر يمورطه گتيرييوردى. هم بر گون ايكى يمورطه گتيردى؛ بن ده حيرتده قالدم. دوستلرمدن صوردم: «بويله اولور مى؟» ديدم. ديديلر: «بلكه بر إحسانِ إلٰهيدر.» هم شو طاووغڭ يازڭ چيقارديغى كوچك بر ياوروسى واردى. رمضانِ شريفڭ باشنده يمورطهيه باشلادى، تا قرق گون دوام ايتدى. هم كوچك، هم قيشده، هم رمضانده، بو مبارك حالى بر إكرامِ ربّانى اولديغنه، نه بنم و نه ده بڭا خدمت ايدنلرڭ شبههمز قالمادى. هم نه وقت آننهسى كسدى، همان او باشلادى.. بنى يمورطهسز بيراقمدى.
* * *
فهرست
سكزنجى مكتوب: …
اوچنجى لمعه: …
دردنجى لمعه: …
يگرمنجى مكتوب - برنجى مقام: …
«مادام رسالۀِ نور هم كرامتليدر هم طريقتلردن زياده ايمان حقيقتلرينڭ إنكشافنده ترقّى ويرييور؛ نهدن أوليالر گبى معنوى ذوقلر و كشفياتلره و مادّى كرامتلره مظهريتلرى گورولمييور هم اونڭ طلبهلرى ده اويله شيلر آرامييورلر؟» سؤالنه گوزل بر جوابدر.
بشنجى مكتوب: …
تصوّفڭ ميوه، حقائقِ إسلاميهنڭ غدا اولديغنى ايضاح ايله، رسالۀِ نورڭ «شو زمانڭ يارهلرينه أڭ مناسب بر علاج، بر مرهم و ظلماتڭ تهاجماتنه معروض هيئتِ إسلاميهيه أڭ نافع بر نور و ضلالت واديلرنده حيرته دوشنلر ايچون أڭ طوغرى بر رهبر اولديغى» حقّندهدر.
تلويحاتِ تسعه: …
ولايت يوللرى حقّنده اولوب، تصوّف و طريقتڭ حقيقتلرينى بيان ايدن غايت معروف بر رسالهدر.
قدر رسالهسىنڭ ذيلى: …
اون بشنجى مكتوب: …
برنجى سؤال: «صحابهلر وليلردن بيوك اولدقلرى حالده، صحابهنڭ ايچندهكى فتنهيى چويرن مفسدلرى نهدن نظرِ ولايتله كشف ايدهمديلر. تا درت خلفاىِ راشديندن اوچينڭ شهادتيله نتيجهلندى؟» سؤالنه ايكى مهمّ مقامله جواب ويريلييور.
اون سكزنجى مكتوب: …
اوچ مسئلۀِ مهمّهدر.
يگرمى آلتنجى مكتوبڭ دردنجى مبحثندن
ايكنجى مسئله: …
«محيى الدينِ عربى، فخر الدّينِ رازىيه: ’اللّٰهى بيلمك، وارلغنى بيلمهنڭ غيريدر.‘ ديمش. بوندن مراد نهدر؟» سؤالنڭ جوابيدر.
دردنجى مسئله: …
«(جَدِّدُوا اٖيمَانَكُمْ بِلَا اِلٰهَ اِلَّا اللّٰهُ) حكمتى نهدر؟» دييه سؤاله، غايت گوزل و نورلى بر بر جوابدر. ديگر بر سؤالڭ جوابنده، وحدانيتڭ غايت عظيم بر حجّتنه و گنيش و اوزون بر برهاننه مختصر بر إشارت واردر.
طوقوزنجى مسئله: …
«أهلِ سنّت و جماعت اولان أهلِ حق دائرهسنڭ خارجنده أهلِ ولايت بولونهبيلير مى؟» سؤالنڭ جوابيدر.
اوننجى مسئله: …
مهمّ بر دستور.
يگرمى سكزنجى مكتوبدن اوچنجى مسئله اولان اوچنجى رساله: …
رسالۀِ نورڭ ظاهرى بر علمدن عبارت اولماديغى، درونى و باطنى حقيقتلرله مجهّز اولوب بِحقّ إرشاد وظيفهسنى گورديگنى ايضاح و إثبات ايدن علمى، نورانى و فيضلى بر درسدر.
صحابهلر رسالهسىنڭ آخرندهكى أهمّيتلى درت سؤال – جواب: …
بر دستور: …
رسالۀِ نورڭ طلبهلرينه نه درجه فيض و نور قزانديرديغى حقّندهدر.
«رسالۀِ نورڭ أركانِ ايمانيه حقّنده بو درجه كثرتلى تحشيداتى نه ايچوندر؟ بر اُمّى مؤمنڭ ايمانى بيوك بر ولينڭ ايمانى گبيدر، دييه أسكى خواجهلر بزه درس ويرمشلر.» سؤالنه حقيقتلى بر جوابدر. …
رسالۀِ نورڭ، يدى مثنوئِ شريف قدر قدسى بر قيمت قزانوب أهلِ حقيقته باقى بر رهبر و مرشد اولاجغى حقّنده، بر سنوحات و مژده. …
أوليا ديوانلرى و علما كتابلريله رسالۀِ نورڭ قيصهجه موازنهسى ياپيلوب رسالۀِ نورڭ أهمّيت و قيمتى بيان ايديلمكدهدر. …
بر مكتوب: …
* * *