دردنجى لمعه
«مِنْهَاجُ السُّنَّه» بو رسالهيه لايق گورولمشدر.
(«مسئلۀِ إمامت» بر مسئلۀِ فرعيه اولديغى حالده، زياده أهمّيت ويريلديگندن بر مسائلِ ايمانيه صيرهسنه گيروب، علمِ كلامده و اصول الدينده مدارِ نظر اولديغى جهتله، قرآنه و ايمانه عائد خدمتِ أساسيهمزه مناسبتى بولونديغندن جزئى بحث ايديلدى.)
﴿بِسْمِ اللّٰهِ الرَّحْمٰنِ الرَّحٖيمِ﴾
﴿لَقَدْ جَٓاءَكُمْ رَسُولٌ مِنْ اَنْفُسِكُمْ عَزٖيزٌ عَلَيْهِ مَا عَنِتُّمْ حَرٖيصٌ عَلَيْكُمْ بِالْمُؤْمِنٖينَ رَؤُفٌ رَحٖيمٌ ۞ فَاِنْ تَوَلَّوْا فَقُلْ حَسْبِىَ اللّٰهُ لَٓا اِلٰهَ اِلَّا هُوَ عَلَيْهِ تَوَكَّلْتُ وَهُوَ رَبُّ الْعَرْشِ الْعَظٖيمِ ۞ قُلْ لَٓا اَسْئَلُكُمْ عَلَيْهِ اَجْرًا اِلَّا الْمَوَدَّةَ فِى الْقُرْبٰى﴾
شو آيتِ عظيمهنڭ چوق حقائقِ عظيمهسندن بر ايكى حقيقتنه «ايكى مقام» ايله إشارت ايدهجگز.
برنجى مقام
«درت نكته»در.
برنجى نكته:
رسولِ أكرم عليه الصلاة والسلامڭ امّتنه قارشى كمالِ شفقت و مرحمتنى إفاده ايدييور. أوت روايتِ صحيحه ايله محشرڭ دهشتندن هركس حتّى أنبيا دخى «نفسى، نفسى» ديدكلرى زمان، رسولِ أكرم عليه الصلاة والسلام «اُمّتى، اُمّتى» دييه رأفت و شفقتنى گوسترهجگى گبى، يڭى دنيايه گلديگى زمان أهلِ كشفڭ تصديقيله والدهسى اونڭ مناجاتندن «اُمّتى، اُمّتى» ايشيتمش.
هم بتون تاريخِ حياتى و نشر ايتديگى شفقتكارانه مكارمِ أخلاق، كمالِ شفقت و رأفتنى گوسترديگى گبى؛ امّتنڭ حدسز صلواتنه حدسز إحتياج گوسترمكله، امّتنڭ بتون سعادتلريله كمالِ شفقتندن علاقهدار اولديغنى گوسترمكله حدسز بر شفقتنى گوسترمش.
ايشته بو درجه شفقتلى و مرحمتلى بر رهبرڭ سنّتِ سنيهسنه مراعات ايتمهمك، نه درجه نانكورلك و وجدانسزلق اولديغنى قياس أيله.
ايكنجى نكته:
رسولِ أكرم عليه الصلاة والسلام، كلّى و عمومى وظيفۀِ نبوّت ايچنده بعض خصوصى، جزئى مادّهلره قارشى عظيم بر شفقت گوسترمشدر. ظاهر حاله گوره او عظيم شفقتى، او خصوصى جزئى مادّهلره صرف ايتمهسى، وظيفۀِ نبوّتڭ فوق العاده أهمّيتنه اويغون گلمييور. فقط حقيقتده او جزئى مادّه، كلّى عمومى بر وظيفۀِ نبوّتڭ مدارى اولابيلهجك بر سلسلهنڭ اوجى و ممثّلى اولديغندن، او سلسلۀِ عظيمهنڭ حسابنه اونڭ ممثّلنه فوق العاده أهمّيت ويريلمش.
مثلا: رسولِ أكرم عليه الصلاة والسلام حضرتِ حسن و حسينه قارشى كوچكلكلرنده گوستردكلرى فوق العاده شفقت و أهمّيتِ عظيمه، يالڭز جبلّى شفقت و حسِّ قرابتدن گلن بر محبّت دگل، بلكه وظيفۀِ نبوّتڭ بر خيطِ نورانيسنڭ بر اوجى و وراثتِ نبويهنڭ غايت أهمّيتلى بر جماعتنڭ منشئى، ممثّلى، فهرستهسى جهتيلهدر.
أوت رسولِ أكرم عليه الصلاة والسلام، حضرتِ حسنى (رض) كمالِ شفقتندن قوجاغنه آلارق باشنى اوپمهسيله؛ حضرتِ حسندن (رض) تسلسل ايدن نورانى نسلِ مباركندن غوثِ أعظم اولان شاهِ گيلانى گبى چوق مهدىمثال ورثۀِ نبوّت و حَمَلۀِ شريعتِ أحمديه (عصم) اولان ذاتلرڭ حسابنه حضرتِ حسنڭ (رض) باشنى اوپمش و او ذاتلرڭ إستقبالده ايدهجكلرى خدمتِ قدسيهلرينى نظرِ نبوّتله گوروب تقدير و إستحسان ايتمش و تقدير و تشويقه علامت اولارق حضرتِ حسنڭ (رض) باشنى اوپمش.
هم حضرتِ حسينه قارشى گوستردكلرى فوق العاده أهمّيت و شفقت، حضرتِ حسينڭ (رض) سلسلۀِ نورانيهسندن گلن زين العابدين، جعفرِ صادق گبى أئمّۀِ عالىشان و حقيقى ورثۀِ نبويه گبى پك چوق مهدىمثال ذواتِ نورانيهنڭ نامنه و دينِ إسلام و وظيفۀِ رسالت حسابنه بويننى اوپمش، كمالِ شفقت و أهمّيتنى گوسترمشدر.
أوت ذاتِ أحمديهنڭ (عصم) غيبآشنا قلبيله، دنياده عصرِ سعادتدن أبد طرفنده اولان ميدانِ حشرى تماشا ايدن و يردن جنّتى گورن و زميندن گوكدهكى ملائكهلرى مشاهده ايدن و زمانِ آدمدن بَرى ماضى ظلماتنڭ پردهلرى ايچنده گيزلنمش حادثاتى گورن، حتّى ذاتِ ذو الجلالڭ رؤيتنه مظهر اولان نظرِ نورانيسى، چشمِ إستقبالبينيسى، ألبته حضرتِ حسن و حسينڭ آرقهلرنده تسلسل ايدن أقطاب و أئمّۀِ ورثه و مهديلرى گورمش و اونلرڭ عمومى نامنه باشلرينى اوپمش. أوت حضرتِ حسنڭ (رض) باشنى اوپمهسنده، شاهِ گيلانىنڭ حصّۀِ عظيمهسى وار.
اوچنجى نكته:
﴿اِلَّا الْمَوَدَّةَ فِى الْقُرْبٰى﴾
آيتنڭ بر قَوله گوره معناسى: «رسولِ أكرم عليه الصلاة والسلام، وظيفۀِ رسالتڭ إجراسنه مقابل اجرت ايستهمز، يالڭز آلِ بيتنه مودّتى ايستهيور.»
أگر دينيلسه: بو معنايه گوره قرابتِ نسليه جهتندن گلن بر فائده گوزهتلمش گورونويور. حالبوكه، (اِنَّ اَكْرَمَكُمْ عِنْدَ اللّٰهِ اَتْقٰيكُمْ) سرّينه بناءً قرابتِ نسليه دگل، بلكه قربيتِ إلٰهيه نقطهسنده وظيفۀِ رسالت جريان ايدييور؟
الجواب: رسولِ أكرم عليه الصلاة والسلام، غيبآشنا نظريله گورمش كه: آلِ بيتى، عالمِ إسلام ايچنده بر شجرۀِ نورانيه حكمنه گچهجك. عالمِ إسلامڭ بتون طبقاتنده كمالاتِ إنسانيه درسنده رهبرلك و مرشدلك وظيفهسنى گورهجك ذاتلر، أكثريتِ مطلقه ايله آلِ بيتدن چيقهجق. تشهّددهكى اُمّتڭ «آل» حقّندهكى دعاسى كه،
﴿اَللّٰهُمَّ صَلِّ عَلٰى سَيِّدِنَا مُحَمَّدٍ وَعَلٰى اٰلِ سَيِّدِنَا مُحَمَّدٍ كَمَا صَلَّيْتَ
عَلٰى اِبْرَاهٖيمَ وَعَلٰى اٰلِ اِبْرَاهٖيمَ اِنَّكَ حَمٖيدٌ مَجٖيدٌ﴾
در. مقبول اولاجغنى كشف ايتمش. يعنى ناصلكه ملّتِ إبراهيميهده أكثريتِ مطلقه ايله نورانى رهبرلر حضرتِ إبراهيمڭ (عس) آلندن، نسلندن اولان أنبيا اولديغى گبى؛ اُمّتِ محمّديهده ده (عصم) وظائفِ عظيمۀِ إسلاميتده و أكثر طُرُق و مسالكنده أنبياءِ بنى إسرائيل گبى، أقطابِ آلِ بيتِ محمّديهيى (عصم) گورمش. اونڭ ايچون (لَٓا اَسْئَلُكُمْ عَلَيْهِ اَجْرًا اِلَّا الْمَوَدَّةَ فِى الْقُرْبٰى) ديمهسيله أمر اولنهرق، آلِ بيته قارشى اُمّتڭ مودّتنى ايستهمش.
بو حقيقتى تأييد ايدن ديگر روايتلرده فرمان ايتمش: «سزه ايكى شى بيراقييورم. اونلره تمسّك ايتسهڭز، نجات بولورسڭز. برى: كتاب اللّٰه، برى: آلِ بيتم.» چونكه سنّتِ سنيهنڭ منبعى و محافظى و هر جهتله إلتزام ايتمهسيله مكلّف اولان آلِ بيتدر.
ايشته بو سرّه بناءًدر كه؛ كتاب و سنّته إتّباع عنوانيله بو حقيقتِ حديثيه بيلديريلمشدر. ديمك آلِ بيتدن، وظيفۀِ رسالتجه مرادى: سنّتِ سنيهسيدر. سنّتِ سنيهيه إتّباعى ترك ايدن، حقيقى آلِ بيتدن اولماديغى گبى، آلِ بيته حقيقى دوست ده اولاماز.
هم اُمّتنى آلِ بيتڭ أطرافنده طوپلامق آرزوسنڭ سرّى شودر كه: زمان گچدكجه آلِ بيت چوق تكثّر ايدهجگنى إذنِ إلٰهى ايله بيلمش و إسلاميت ضعفه دوشهجگنى آڭلامش. او حالده غايت قوّتلى و كثرتلى بر جماعتِ متسانده لازم كه، عالمِ إسلامڭ ترقّياتِ معنويهسنده مدار و مركز اولابيلسين. إذنِ إلٰهى ايله دوشونمش و اُمّتنى آلِ بيتى أطرافنه طوپلاماسنى آرزو ايتمش.
أوت آلِ بيتڭ أفرادى ايسه، إعتقاد و ايمان خصوصنده سائرلردن چوق ايلرى اولماسه ده، ينه تسليم، إلتزام و طرفگيرلكده چوق ايلريدهدرلر. چونكه إسلاميته فطرةً، نسلًا و جبلّيةً طرَفداردرلر. جبلّى طرفدارلق ضعيف و شانسز، حتّى حقسز ده اولسه بيراقيلماز. نرهده قالدى كه، غايت قوّتلى، غايت حقيقتلى، غايت شانلى، بتون سلسلۀِ أجدادى باغلانديغى و شرف قزانديغى و جانلرينى فدا ايتدكلرى بر حقيقته طرفدارلق، نه قدر أساسلى و فطرى اولديغنى بِالبداهه حسّ ايدن بر ذات، هيچ طرفدارلغى بيراقير مى؟ أهلِ بيت، ايشته بو شدّتِ إلتزام و فطرى إسلاميت جهتيله دينِ إسلام لهنده أدنا بر أمارهيى، قوّتلى بر برهان گبى قبول ايدر. چونكه فطرى طرفداردر. باشقهسى ايسه، قوّتلى بر برهان ايله صوڭره إلتزام ايدر.
* * *