اونلرى آيينه‌دارلق و وظيفه‌دارلق و معنيدارلق مقامندن دوشوروب، عبثيت و تصادفڭ اويونجغى دركه‌سنه و زوال و فراقڭ تخريبيله چابوق بوزولوب دگيشن موادِّ فانيه يه و أهمّيتسزلك، قيمتسزلك، هيچلك مرتبه‌سنه اينديرديگى گبى.. بتون كائناتده و موجوداتڭ آيينه‌لرنده نقشلرى و جلوه‌لرى و جماللرى گورونن أسماءِ إلٰهيه يى إنكار ايله تزييف ايدر. و إنسانلق دينيلن، بتون أسماءِ قدسيۀِ إلٰهيه‌نڭ جلوه‌لرينى گوزلجه إعلان ايدن بر قصيدۀِ منظومۀِ حكمت و بر شجرۀِ باقيه‌نڭ جهازاتنى جامع چكردك‌مثال بر معجزۀِ قدرتِ باهره و أمانتِ كبرايى عهده‌سنه آلمقله ير، گوك، طاغه تفوّق ايدن و ملائكه يه قارشى رجحانيت قزانان بر صاحبِ مرتبۀِ خلافتِ أرضيه يى؛ أڭ ذليل بر حيوانِ فانئِ زائلدن داها ذليل، داها ضعيف، داها عاجز، داها فقير بر دركه يه آتار. و معناسز، قارمه‌قاريشيق، چابوق بوزولور بر عادى لوحه دركه‌سنه اينديرر.