دنيا موقّت بر تجارتگاه و هر گون طولار بوشالير بر مسافرخانه و گلن گچنلرڭ آليش ويريشى ايچون يول اوستنده قورولمش بر پازار و نقّاشِ أزلينڭ تجدّد ايدن (حكمتله يازار بوزار) بر دفترى و هر بهار بر يالديزلى مكتوبى و هر بر ياز بر منظوم قصيده‌سى و او صانعِ ذو الجلالڭ جلوۀِ أسماسنى تازه‌لنديرن، گوسترن آيينه‌لرى و آخرتڭ فدانلق بر باغچه‌سى و رحمتِ إلٰهيه‌نڭ بر چيچكدانلغى و عالمِ بقاده گوستريله‌جك اولان لوحه‌لرى يتيشديرمگه مخصوص موقّت بر تزگاهى ماهيتنده گوردم. بو دنيايى بو صورتده يارادان خالقِ ذو الجلاله يوز بيڭ شكر ايتدم. و آڭلادم كه؛ دنيانڭ، آخرته و أسماءِ إلٰهيه يه باقان گوزل ايچ يوزلرينه قارشى نوعِ إنسانه محبّت ويريلمشكن، او محبّتى سوءِ إستعمال ايده‌رك فانى، چركين، ضررلى، غفلتلى يوزينه قارشى صرف ايتديگندن، (حُبُّ الدُّنْيَا رَاْسُ كُلِّ خَطٖيئَةٍ) حديثِ شريفنڭ سرّينه مظهر اولمشلر.