اولدقلرى قناعتنه وارييورلر. أنانيت و علمى قيصقانجلق گبى خستهلقلره مبتلا اولمقدن قورقان فضيلتلى عالم و منوّرلر رسالۀِ نوره درحال صاريلييورلر. بعضلرى آلتمش يتمش ياشلرنده اولديغى حالده ينه نور رسالهلرينه طلبه اولمق شرف و نعمتنى قزانمغه چاليشييورلر.
بديع الزمان سعيد النورسى حضرتلرى دييور كه: «رسالۀِ نور باشقه كتابلر گبى يالڭز علم ويرمييور؛ اونڭ معنوى درسى ده واردر.»
ايشته بو معنوى درسڭ تأثيريدر كه: رسالۀِ نورى اوقويانلرڭ روح و قلبلرى، وجدان و لطيفهلرى او فيّاض درسدن حصّهلرينى و غدالرينى آلييورلر. بو معنوى درسڭ نفوذى دگل ميدر كه؛ نور رسالهلرينى اوقويانلرڭ معنوى عالملرى إلٰهى نورلرله ييقانييور و إلٰهى بر جاذبه و إلٰهى بر تأثير ايله ايمان حقيقتلرينه مسخّر و مفتون و مجلوب بر حاله گلهرك اللّٰه و رسول اللّٰه يولنده يوكسهلييورلر. علمِ ايمان عاشقلرى رسالۀِ نور اوقويور.