آرقه‌سنده ذاتِ أحديتى ملاحظه ايدوب (اِيَّاكَ نَعْبُدُ وَاِيَّاكَ نَسْتَعٖينُ) ديمگه كُرۀِ أرض وسعتنده بر قلب بولونمق لازم گلييور. و بو سرّه بناءً جزئياتده ظاهر بر صورتده سكّۀِ أحديتى گوسترديگى گبى، هر بر نوعده سكّۀِ أحديتى گوسترمك و ذاتِ أحدى ملاحظه ايتديرمك ايچون خاتمِ رحمانيت ايچنده بر سكّۀِ أحديتى گوسترييور؛ تا كلفتسز هركس هر مرتبه‌ده (اِيَّاكَ نَعْبُدُ وَاِيَّاكَ نَسْتَعٖينُ) دييوب طوغريدن طوغرى يه ذاتِ أقدسه خطاب ايده‌رك متوجّه اولسون.
ايشته قرآنِ حكيم، بو سرِّ عظيمى إفاده ايچوندر كه، كائناتڭ دائرۀِ أعظمندن مثلا سماوات و أرضڭ خلقتندن بحث ايتديگى وقت، بردن أڭ كوچك بر دائره‌دن و أڭ دقيق بر جزئيدن بحث ايدر؛ تا كه، ظاهر بر صورتده خاتمِ أحديتى گوسترسين. مثلا: خلقتِ سماوات و أرضدن بحثى ايچنده خلقتِ إنساندن و إنسانڭ سسندن و سيماسنده‌كى دقائقِ نعمت