ذاتًا گوزيڭزله گورييورسڭز كه، بال يينلر اورايه گيرييورلر و اورايه گيرنجه يه قدر او حلوانڭ زهرندن دهشتلى قارين صانجيسى چكييورلر و او بيوك إكراميه بيلتنى آلانلر چندان گورونمييورلر و ظاهرًا اونلر ده او دار آغاجنه چيقدقلرى گورونويور. فقط اونلر آصيلمدقلرينى، بلكه اورادن قولايجه إكراميه دائره‌سنه گيرمك ايچون باصامق ياپدقلرينى، ميليونلر شاهدلر وار، خبر ويرييورلر. ايشته پنجره‌لردن باقڭز. أڭ بيوك مأمورلر و بو ايشله علاقه‌دار بيوك ذاتلر يوكسك سسله إعلان ايدييورلر و خبر ويرييورلر كه؛ او دار آغاجنه گيدنلرى عين اليقين گوزيڭز ايله گورديگڭز گبى، بو إكراميه بيلتنى طلسمجيلر آلدقلرينى هيچ شك و شبهه‌سز گوندوز گبى قطعى بيليڭز.» ديدى.
ايشته بو تمثيل گبى زهرلى بر بال حكمنده اولان غيرِ مشروع دائره‌ده‌كى گنجلگڭ سفاهتكارانه ذوقلرى، خزينۀِ أبديه‌نڭ و سعادتِ سرمديه‌نڭ بيلتى و وثيقه‌سى