هم ديمه كه: «بن حيوان گبى حياتمى گچيره‌جگم.» چونكه حيوانه نسبةً ماضى، مستقبل غيب حكمنده‌در. جنابِ حكيمِ رحيم او غيبى اونلره بيلديرمه‌مكله، اونلرى حدسز ألملردن قورتارمش. حتّى كسيلمك ايچون ياتيريلان بر طاووق، هيچ بر ألم و حزن حسّ ايتمز. بيچاق كسديگى وقت حسّ ايتمك ايستر، فقط حسّ گيدر، او ألمدن ده قورتولور. ديمك جنابِ حقّڭ غايت بيوك و مكمّل بر رحمتى، رأفتى و شفقتى، غيبى بيلديرمه‌مكده‌در. بِالخاصّه معصوم حيوانلر حقّنده داها تامدر. ديمك سفيهانه لذّتده، سن حيوانلره يتيشه‌مزسڭ. بيڭلر درجه آشاغى دوشرسڭ. چونكه حيوانه نسبةً غيبى اولان شيلرى سنڭ عقلڭ گورويور، ألمنى آلييور. سترِ غيبده بولونان إستراحتِ تامّه‌دن بِالكلّيه محرومسڭ.
هم سنڭ مدارِ فخرڭ اولان اخوّت و حرمت و حميت گبى گوزل خصلتلرڭ؛ اينجه‌جك بر زمانه، بيوك