اوچنجى قطره:
آلتى نقطهدر. اوچنجى نقطهسنده: ناصلكه إنسان مختلف حاجاتِ جسمانيهيه مختلف وقتلرده محتاجدر. مثلا: هوايه هر آن، حرارته، صويه هر وقت، غدايه هر گون، ضيايه هر هفته محتاجدر. اويله ده حاجاتِ معنويۀِ إنسانيه ده مختلفدر. بر قسمنه هر آن محتاجدر. لفظ اللّٰه گبى. بر قسمنه هر وقت محتاجدر. بسم اللّٰه گبى. بر قسمنه هر ساعت محتاجدر. «لَا اِلٰهَ اِلَّا اللّٰه» گبى. و هكذا قياس ايت.
دردنجى قطره:
آلتى نكتهدر. بشنجى نكتهسنده چوق آيتِ كريمه بولونماسندن؛ و اوراسى ده ايضاح مقامى اولماديغندن معجزاتِ قرآنيهيه حواله ايديلهرك او نكته طىّ ايديلمشدر. بعضًا بر حرفِ قرآنيده، قرآنڭ إعجازينى إثبات ايدن بو رساله و آرقداشلرى اولان «إشارات الإعجاز» و «معجزاتِ قرآنيه» رسالهلرى، قرآنِ حكيمڭ برر ألماس قلنجيدرلر.
آلتنجى قطره:
بلاغتِ قرآنيهنڭ بر سرّينى كشف ايدهرك؛ أديبلرڭ
﴿اُنْظُرْ اِلٰى مَنْ قَالَ﴾
يعنى «كيم سويلهمش» ديمهلرينه مقابل
﴿اُنْظُرْ اِلٰى مَنْ قَالَ وَلِمَنْ قَالَ وَلِمَا قَالَ وَفٖيمَا قَالَ﴾
دييهرك إعجازِ قرآنيهيى پارلاتديرييور. بو آلتنجى قطره، بلاغتِ قرآنيه ايچون مهمّ بر آناختاردر.
بو قطره رسالهسندن صوڭره (الدرس الخامس) نامنده، رسالۀِ نوردهكى اون برنجى سوزڭ خلاصهسى اولان، استاديمزڭ أسكى طلبهلرينه ويرديگى درس واردر. چوق اينجه معنالرى بيان ايدن بو كوچك رساله ايله مثنوئِ عربيۀِ نوريهنڭ اوننجى رسالهسى ده بر دعا ايله ختامه ايرر.
﴿اَللّٰهُمَّ اخْتِمْ لَنَا بِالسَّعَادَةِ وَالشَّهَادَةِ وَالْكَرَامَةِ وَالْبُشْرٰى اٰمٖينَ اٰمٖينَ اٰمٖينَ﴾