يدنجى رمز:
﴿وَبِالْاٰيَةِ الْكُبْرٰى اَمِنّٖى مِنَ الْفَجَتْ وَبِحَقِّ فَقَجٍ مَعَ مَخْمَةٍ يَا اِلٰهَنَا وَبِاَسْمَائِكَ الْحُسْنٰى اَجِرْنٖى مِنَ الشَّتَتْ﴾
جملهسيله اوتوزنجى لمعه اولان آلتى نكتۀِ أسماء رسالهسنه، هم
﴿حُرُوفٌ لِبَهْرَامٍ عَلَتْ وَتَشَامَخَتْ﴾
كلمهسيله اوتوز برنجى لمعهنڭ برنجى شعاعى اولان و اوتوز اوچ آياتِ قرآنيهنڭ رسالۀِ نوره إشاراتنى إثبات ايدن و برر معجزۀِ قرآنيه حكمنده بولونان رسالهيه إشارتلرينى گوستروب إثبات ايدر.
سكزنجى رمز:
أوّلاً ايكى سؤال جواب ايله مهمّ بر حقيقتى بيان ايدر. شويله كه: بتون قيمتدار كتابلر ايچنده رسالۀِ نورڭ قرآنڭ إشارات و إلتفاتنه و أولياءِ عظامڭ تقدير و تبشير و تحسيننه وجهِ إختصاصنى، هم رسالۀِ نورڭ بِالفعل خارق العاده اولارق بو عصرِ ظلمت و وحشت و دهشتده دشمنلرينه قارشى مقاومتى و رصانتى و مؤمنلره قارشى شفقت و حمايتى و طلبهلرينه إكسيرِ نور و وراثتِ نبوّتله خارقه بر صورتده حقيقت تدريسى و علم إهداسى و محيى إسمنه مظهريتله ئولو قلبلرڭ ديرلمسى رسالۀِ نورڭ بر كرامتى و بزلره و أهلِ ايمانه بر إكرامِ إلٰهى و بر إنعامِ ربّانى اولديغندن إظهارى تحديثِ نعمت اولديغنى دليللريله إثبات و بيان ايدوب خصوصى قناعتندن تولّد ايدن چوق أمارهلر و قرينهلردن اوچنى ذكر ايله كرامتِ عَلويهيى تصديق و تمهير ايدوب خاتمه ويرر.
اوتوز برنجى مكتوبڭ اوتوز برنجى لمعهسنڭ اوتوز بر مسئلهسندن برنجى مسئلهسى:
﴿اِنَّ الْخِلَافَةَ بَعْدٖى ثَلَاثُونَ سَنَةً﴾
حديثِ شريفنڭ إخبارِ غيبى نوعندن تاريخجه مصدّق بش لمعۀِ إعجازيهسنى بيان ايتمكله لسان الغيب، حبيبِ ربّ العالمين و سيّد المرسلين و فخر العالمين اولان ذاتڭ قيصهجق بر حديثنده بش لمعۀِ