أكسيلديگى گورولمز. بلكه ده أصحابِ كهفڭ كنديلرينى دينلرندن چيقارمق ايچون چاليشان پادشاهلرينه ديدكلرى گبى، «أى مَلِك! آگاه اول، نه ياپارسهڭ ياپ. سنڭ إجبار و إصرارڭله بز نه سويلرسهك سز اينانمايڭز. بزلر دينلريمزى تبديل ايديجيلر دگلز.» ديديرتير.
خسرو
سَوْگيلى استاديمه و مبارك قارداشلريمه بر إعتذارم وار:
حصّهمه إصابت ايدن بو أهمّيتلى و قيمتلى رساله ايله ديگر عظمتلى رسالهلرى جهلم و إستعدادسزلغم نتيجهسى لايق اولدقلرى گبى يازامديغمدن، هر وقت أللرندن اوپوب خير دعاسنه أل آچديغم سَوْگيلى استادم وياخود مبارك قارداشلرم ناصل مناسب گورورلرسه اويلهجه تبديل ايدهبيليرلر.(حاشيه)
قصورلى قارداشڭز
خسرو
سكزنجى شعاع
بو شعاع، إمامِ على رضى اللّٰه عنهڭ قصيدۀِ جلجلوتيهسنده اوچنجى بر كرامت اولارق رسالۀِ نورڭ أڭ نامدار رسالهلرينى سكز رمز ايله گوسترديگنه دائردر.
برنجى رمز:
رسالۀِ نورى تصريح ايدن
﴿تُقَادُ سِرَاجُ النُّورِ سِرًّا بَيَانَةً﴾
فقرهسندن صوڭره سُريانى لسانيله أسماءِ حسنىدن إستمداد و سُوَرِ قرآنيه ايله
___
(حاشيه): غايت گوزل و مناسب گوردك و يازدق. بيڭ بارك اللّٰه.