ايجاد ويرنلر «كتاب، ساعت، فابريقه و سراى مثاللريله» أجهليتلرڭ أڭ آنتيقهسنى إرتكاب ايتدكلرينى ايضاح ايدر.
بشنجى إشارت:
مداخلۀِ غيرى شدّتله ردّ ايدن؛ حاكميتِ إلٰهيهدر.
﴿لَوْ كَانَ فٖيهِمَٓا اٰلِهَةٌ اِلَّا اللّٰهُ لَفَسَدَتَا﴾
آيتنڭ سرّيله و
﴿فَارْجِعِ الْبَصَرَ هَلْ تَرٰى مِنْ فُطُورٍ﴾
آيتنڭ إشارتيله، ذرّاتدن سيّاراته قدر، فرشدن عرشه قدر هيچ بر جهتده قصور و فطور، نقصانيت و مشوّشيت أثرى گورولمهمسى، فرديتڭ جلوۀِ أعظمنى گوستروب، وحدته شهادت ايدر.
آلتنجى إشارت:
بتون كمالاتڭ مدارى و أساسى؛ و كائناتڭ خلقتندهكى حكمتلرڭ و مقصدلرڭ منشئى و معدنى؛ و ذىشعور و ذىعقلڭ، خصوصًا إنسانڭ مطالب و آرزولرينڭ حصول بولماسنڭ منبعى و چارۀِ يگانهسى، فرديتِ ربّانيه و وحدتِ إلٰهيه اولماسيدر.
يدنجى إشارت:
توحيدِ حقيقىيى بتون مراتبيله أڭ أكمل بر صورتده درس ويروب إثبات ايدن و إعلان ايدن محمّد عليه الصلاة والسلامڭ رسالتى، او توحيدڭ قطعيتى درجهسنده ثابت اولديغنى ايضاحله برابر؛ شخصيتِ معنويۀِ محمّديه عليه الصلاة والسلامڭ درجۀِ أهمّيت و علويتنه شهادت ايدن پك چوق دليللردن اوچ دانهسنى ذكر ايدر.
برنجيسى: (اَلسَّبَبُ كَالْفَاعِلِ) سرّيله، عموم امّتنڭ بتون زمانلرده ايشلدكلرى حسناتڭ بر مِثلى دفترِ حسناتنه گچمكله و خصوصًا هر گونده عموم اُمّتڭ ايتدكلرى صلوات دعاسنڭ قطعى مقبوليتى جهتيله؛ او حدسز دعالرڭ إقتضا ايتدكلرى مقام و مرتبهيى دوشونديرمكله شخصيتِ معنويۀِ محمّديهنڭ (عصم) كائنات ايچنده ناصل بر گونش اولديغى آڭلاشيلديغنى..