يگرمى ايكنجى نكته:
ايكى مهمّ و هركسه لزوملى و فطرتى بوزولمهمش هر بر قلبِ سليم و وجدان صاحبى دائما كندى آيينۀِ حياتنده حسّ ايدوب گورهبيلهجگى بر نكتهدر.
برنجيسى: أخلاقه دائر اولوب إنسانى (تَخَلَّقُوا بِاَخْلَاقِ اللّٰهِ) مئالندهكى حديثِ شريفه مظهر ايدر.
ايكنجيسى:
﴿وَمَا خَلَقْتُ الْجِنَّ وَالْاِنْسَ اِلَّا لِيَعْبُدُونِ ۞ مَٓا اُرٖيدُ مِنْهُمْ مِنْ رِزْقٍ وَمَٓا اُرٖيدُ اَنْ يُطْعِمُونِ ۞ اِنَّ اللّٰهَ هُوَ الرَّزَّاقُ ذُو الْقُوَّةِ الْمَتٖينُ﴾
آيتِ كريمهسنڭ إعجازندن سوزولن بر معنا ايله بشرڭ أڭ بيوك و همان همان عمومى شكلنى آلان تحصيلِ رزقده شدّتِ حرص يوزندن شركِ خفىيه دوشمكله برابر عبادتى ترك ايتدكلرندن رحمتِ إلٰهيه و حكمتِ سبحانيه و إلهامِ رحمانى ايله بشرى توكّل و رضايه، تسليم و رجايه سَوق ايدن و دار السلامه دعوت ايدن و چوقلر اوزرنده خيرخواهلغنى و تأثيرينى گوسترن بر إكسيرِ نورانيدر.
يگرمى اوچنجى نكته:
رسالۀِ نورڭ مهمّ أركانندن بر شاكردينڭ طرفگيرانه و رسالۀِ نوره رقيبانه سويلهنن سوزلره قارشى طاتلى و شيرين بر مقابله و حقيقتبين بر تحقيقى فقرهدر.
يگرمى دردنجى نكته:
رسالۀِ نورڭ مؤلّفنه شموللى و رموزلى بولونان بر قارداشڭ رؤياسيدر.
يگرمى بشنجى نكته:
رسالۀِ نوردن ايمانِ تحقيقى درسنى آلان و أبده نامزد روحنڭ نشئه و سَوينمهسندن گلن ذوق ايله اوڭا سويلتديريلن، ألماس و جواهرله مزيَّن بر قارداشڭ فقرهسيدر.