طبيبلگنى (حاشيه) و يالڭزلقده انسيتى و تنبللكده طهارت و نظافتيله معلّملگنى درس ويرن سينگڭ إنسانه نه قدر منفعتدار اولديغنى گوسترمكله مجرب إنسانه سينگى سَوْديرن هركسه لزوملى بر نكتهدر.
دردنجى نكته:
﴿وَاَنْزَلْنَا الْحَدٖيدَ فٖيهِ بَاْسٌ شَدٖيدٌ وَمَنَافِعُ لِلنَّاسِ﴾
آيتنڭ (اَنْزَلْنَا) كلمهسنه گلن بر إعتراضه غايت مسكت بر جواب و غايت لزوملى بر علم و قرآنڭ حكمتلى درسنى گوسترن قيمتلى بر نكتهدر.
بشنجى نكته:
﴿يُخْرِجُ الْخَبْءَ فِى السَّمٰوَاتِ وَ الْاَرْضِ﴾
آيتِ كريمهسندهكى أوصافِ إلٰهيهيى صنعتنڭ مقياسجغيله تعريف ايدن هُدْهُدِ سليمانى حقّندهدر.
آلتنجى نكته:
﴿قُلْ لَوْ كَانَ الْبَحْرُ مِدَادًا لِكَلِمَاتِ رَبّٖى لَنَفِدَ الْبَحْرُ قَبْلَ اَنْ تَنْفَدَ كَلِمَاتُ رَبّٖى وَلَوْ جِئْنَا بِمِثْلِهٖ مَدَدًا﴾
بش كلمه ايله ايكى حرف ايله شو آيتِ كريمهدهكى نهايتسز كلماتِ إلٰهيهيه إشارت ايدوب كلامدن، كلمهدن متكلّمِ أزلىيه يوزلرى چويرن بحرِ حقائقڭ بر فهرستهسى و آبِ حياتڭ منبع و مأخذى و علمِ حقيقته مرشد بر نكتهدر.
___
(حاشيه): شو نكتهنڭ بر حقيقتنى إثبات ايدن بر واقعه: ياقينمزده بر كويدن بر كيشى طاغه گيدر، طاغده حيواننى ييلان صوقماسيله حيوان شيشر. حيوانڭ كويه گلمهسى إمكانسز اولديغنى گورن صاحبى نااُميد اولارق حيوانى بيراقير، كويه گلير. ايرتسى گون دريسنى آلمق ايچون گيدر. حيوانى ايى اولمش بولور. دقّت ايدر گورور كه، حيوانڭ ياتديغى يرده سينگڭ بر نوعى اولان يشيل باشلى سينكلردن بيڭلر سينك جنازهسى وار. اوندن آڭلار كه، سينكلر حيوانڭ قاننى أممك ايله قاندهكى سمّى صورمشلر، حيوانى قورتارمشلر فقط كنديلرى ئولمشلر.