عبادت و أورادينڭ ثوابى عينًا و داها خالص بر صورتده ويريلهجگى حديثجه ثابت اولديغى؛ و إنسان او سايهده عجزينى و ضعفنى بيلديگندن، بتون جهازاتنڭ لسانِ حال و لسانِ قاليله درگاهِ إلٰهيهيه إلتجا ايتمهسنه سبب اولديغندن،
﴿قُلْ مَا يَعْبَؤُا بِكُمْ رَبّٖى لَوْلَا دُعَٓاؤُكُم﴾
سرّينى آڭلاتديغندن، شكايت دگل، شكر ايتمك لازم اولديغنى گوسترر.
اون اوچنجى دوا:
خستهلقدن شكايت ايديلميهجگنى؛ و خستهلق بعضلرينه بر دفينه اولديغنى؛ و أجل معيّن اولماديغندن، هر وقت خوف و رجا اورتهسنده بولونمق لازم اولديغنى؛ و ئولوم إنسانى غفلت ايچنده ياقالامق إحتمالى بولونديغندن، خستهلق اونڭ آخرتنى دوشونديرمك جهتيله غايت گوزل بر ناصح اولديغنى گوسترر مهمّ بر دوادر.
اون دردنجى دوا:
هم أهلِ ايمانڭ گوز خستهلغى پردهسى آلتنده (يعنى كور اولماسنده) پك مهمّ بر نور و معنوى بيوك بر گوز اولوب، بر قاچ سنه دنيانڭ حزينانه فانى بر گوزللگنى فانى بر صورتده سير ايدهجك فانى بر گوزه بدل، قرق گوز قوّتنده أبدى گوزلر ايله أبدى بر صورتده جنّتده جنّت لوحهلرينى سير ايتمهسى داها أولٰى اولاجغنى بيان ايدر.(حاشيه)
___
(حاشيه): بو دوانڭ تأثيرندندر كه: مسافرةً بر كويه گيتديگمده؛ اوراده گوزسز محمد آغا إسمنده بر ذات، گوزينڭ خستهلغندن شكايتى اوزرينه، يانمده بولونان خستهلر رسالهسنڭ اون دردنجى دواسنى اوقوينجه، اونڭ معنوى تأثيريله او ذات ديدى: "كاشكه بن بو ثوابى و معنوى بو قزانجى؛ بڭا آچان بو خستهلغمدن شكايت ايتمهسه ايدم." دييه ندامتكارانه، بر شكر قپوسنه دوندى. اونڭ ايچون او خستهلق، اونڭ حقّنده بر رحمتِ إلٰهيه اولديغنى قطعى آڭلادى.