بيوك و عمومى و قدسى بر وظيفۀِ ايمانيه و خدمتِ قرآنيه، صِرف بر إحسانِ إلٰهى اولارق، جنابِ حق طرفندن اوموزلريڭزه قونولمشدر. اويله ايسه، هركسدن زياده إخلاصى قزانمغه و اونڭ سرلرينى كنديڭزده يرلشديرمگه مجبور و مكلّف اولديغڭزى بيلمهليسڭز. و إخلاصى ضايع ايدن أسبابدن شدّتله قاچماليسڭز.» دير و إخلاصى قزانمق ايچون درت دستورى بيان ايدر.
برنجى دستور:
«طوغريدن طوغرىيه رضاىِ إلٰهىيى مقصد ياپماليسڭز» دير.
ايكنجى دستور:
رقابتسز، تحكّمسز، غبطهسز، عطالتسز، حقيقى بر تساند ايله، فعاليتلرينى عمومى مقصده توجيه ايدهرك چاليشان بر فابريقهنڭ چرخلرى گبى اولماليسڭز، دير. و سعادتِ أبديهيى نتيجه ويرن و اُمّتِ محمّديهيى (عصم) دنيا و آخرتده ساحلِ سلامته چيقاران بر سفينۀِ ربّانيهده خدمت ايتديرلديگڭز ايچون إخلاصه، إتّفاقه، تسانده صميميتله صاريلماليسڭز دييه أمر ايدر.
اوچنجى دستور:
هم بر قاچ مثال ايله إخلاصڭ بر سرِّ مهمّنى ايضاح ايدر؛ هم إمامِ على (رض) و شاهِ گيلانى (رض) گبى قدسى، خارقه قهرمانلرڭ، نور طلبهلرينڭ باشلرنده استاد و آرقهلرنده يارديمجى اولارق، هر وقت حاضر اولدقلرينڭ وجهنى بيان ايدر.
دردنجى دستور:
قارداشلر آراسنده «تفانى» سرّينى، يعنى «قارداش قارداشده فانى اولمق» أساسنى إقامه ايدر.
و إخلاصى قوّتلنديرن بر واسطهنڭ «رابطۀِ موت» اولديغنى و زدهلهين سببلرڭ «ريا و طولِ أمل» گبى مردود خصلتلر اولديغنى بيلديرر.