سَوق ايدن ساختهكار حميتفروشلرى، قرآنڭ ألماس قلنجيله ئولديرهرك، إرتداده يوز طوتان وياخود مرتبۀِ فسقه اينن أهلِ ايمانى، قرآنِ حكيمڭ خستهخانهسنه آلير، تداوى ايدر.
سكزنجى نوطه:
﴿وَ رَحمتٖى وَسِعَتْ كُلَّ شَيْءٍ﴾
نڭ بر سرّينى،
﴿وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
نڭ بر حقيقتنى،
﴿اِنَّمَٓا اَمْرُهُٓ اِذَٓا اَرَادَ شَيْئًا اَنْ يَقُولَ لَهُ كُنْ فَيَكُونُ﴾
نڭ بر دستورينى،
﴿فَسُبْحَانَ الَّذٖى بِيَدِهٖ مَلَكُوتُ كُلِّ شَىْءٍ وَاِلَيْهِ تُرْجَعُونَ﴾
نڭ بر نكتهسنى تفسير ايدوب، كائناتده ذرّهدن شمسه قدر هر شى بر وظيفه ايله مكلّف اولوب، بتون سعى و حركتلرى قانونِ قدر ايله جريان ايتديگنى؛ و جنابِ حق كمالِ كرمندن، خدمت ايچنده مكافات اولارق بر لذّت درج ايتديگنى إثبات و ايضاح ايله.. موجوداتڭ أڭ مكمّلى و ذىحياتڭ رئيسى و أرضڭ خليفهسى اولان إنسان، تنبللك ايدوب غفلته دوشرسه؛ جماداتدن داها جامد، سينكدن چكرگهدن داها قانسز اولاجغنى ايقاظ و إنذار ايله، إنسانلرى وظيفۀِ فطريهلرينه سَوق ايدوب، الوهيتِ مطلقهيى إثبات ايدر.
طوقوزنجى نوطه:
جنابِ حق كمالِ كرميله، أڭ بيوك شيئى أڭ كوچك شيده درج ايتديگى جهتله؛ كائناتدهكى خير و كمالاتى، شجرۀِ كائناتڭ ميوهسى و چكردگى اولان، نوعِ إنسانڭ حقيقتنى طاشييان نبيلرده گوسترديگنى؛ و نبيلره إنتساب ايدن، خير و كمالاته، نوره و سروره چيقهجغى گبى، عبوديت جهتيله ده، بر ذرّه گبى كوچك بر مخلوق اولان إنسانڭ، فهرستيت و او إنتساب جهتيله، آغزندن چيقان «اللّٰه أكبر» صداسى، كُرۀِ أرضڭ بيوك بر «اللّٰه أكبر»ى حكمنه گچديگنى، حقّ اليقين بر بيان ايله، حقّڭ سعادتنى، ايمانڭ حسنِ كمالنى بِالبداهه إظهار ايدوب.. ضلالت، شر، خسارت؛ دينڭ مخالفنده اولديغنى قطعى إثبات ايدر.