﴿بِسْمِ اللّٰهِ الرَّحْمٰنِ الرَّحٖيمِ﴾
اون آلتنجى لمعه
مسائلِ مهمّهدن بعض مسائل حقّنده صوريلان سؤاللرڭ جوابلرينى محتويدر. شويله كه؛ أڭ باشده، مراقآور درت سؤاله جوابدر.
برنجيسى: «أهلِ سنّت و جماعت حقّنده بر فرَج و بر فتوحات اولاجغى حقّنده أهلِ كشفڭ ويرديگى خبرلرڭ ظهور ايتمهمسى نهدندر؟» دييه صورولماسنه مقابل، غايت گوزل بر جوابدر.
ايكنجيسى: «رسالۀِ نورڭ مؤلّفى، كنديسنى شدّتلى تضييقات آلتنده طوتان أهلِ دنيانڭ عليهنده بولونماسى لازم گليركن، اونلره مادّةً ايليشمهمسنڭ سببى نهدر؟» سؤالنه غايت لطيف بر جوابدر.
اوچنجيسى: «إنگليز و ايتاليان گبى حكومتلرڭ بو حكومتله محاربه ايتمك ايستهملرينه قارشى، نهدن شدّتلى بر صورتده حرب عليهنده بولونويورسڭز؟ حالبوكه بو گبى حادثهلر، ملّتڭ قوّۀِ معنويهسنڭ منبعى اولان حميتِ إسلاميهيى تهييج ايتمكله، شعائرِ إسلاميهنڭ إحياسنه و بدعهلرڭ رفعنه بر درجه مدار اولور.» دييه واقع سؤاله ويريلن پك لطافتلى بر جوابدر.
دردنجيسى: «نهدن ألڭزدهكى نورلى رسالهلرى هركسه گوسترمهمك ايچون، آرقداشلريڭزه إحتياطى توصيه ايدييورسڭز؟ و نهدن خلقلرى بو نورلرڭ فيضلرندن محروم ايدييورسڭز؟» سؤالنه ويريلن پك خوش، پك گوزل بر جوابدر.