كَزَرْعٍ اَخْرَجَ شَطْاَهُ فَاٰزَرَهُ فَاسْتَغْلَظَ فَاسْتَوٰى عَلٰى سُوقِهٖ يُعْجِبُ الزُّرَّاعَ لِيَغٖيظَ بِهِمُ الْكُفَّارَ وَعَدَ اللّٰهُ الَّذٖينَ اٰمَنُوا وَعَمِلُوا الصَّالِحَاتِ مِنْهُمْ مَغْفِرَةً وَاَجْرًا عَظٖيمًا ۞﴾
اولان اوچ آيتِ عظيمهدن اون وجوهِ إعجازيهدن يالڭز إخبارِ بِالغيب وجهندن سكز إخباراتِ غيبيهيى بيان ايدييور؛ شو اوچ آيت، تك باشيله بر معجزۀِ باهره اولديغنى إثبات ايدييور. تتمّهسنده،
﴿فَاُولٰٓئِكَ مَعَ الَّذٖينَ اَنْعَمَ اللّٰهُ عَلَيْهِمْ مِنَ النَّبِيّٖنَ وَالصِّدّٖيقٖينَ وَالشُّهَدَٓاءِ وَالصَّالِحٖينَ وَحَسُنَ اُولٰٓئِكَ رَفٖيقًا﴾
آيتنڭ مهمّ بر نكتۀِ إعجازيهسنى، سورۀِ فتحڭ آخرندهكى آيتڭ عين إخبارِ غيبيسى نوعندن، غيبى إخبارلرينه إشارت ايدر.
خاتمهسنده، قرآنِ حكيمڭ توافقات جهتنده إعجازى نكتهلرندن غايت پارلاق بر نكتۀِ إعجازيهسنى بيان ايدوب؛ قرآن فاتحهده، فاتحه بسملهده، بسمله (الم) ده بر جهتده درج ايديلديگنى بيان ايدييور.
هم أڭ منتشر و متداول دركنار مصحفلرده لفظ اللّٰهڭ توافقاتِ لطيفۀِ إعجازيهسندن بريسى شودر كه: صحيفهنڭ آخركى سطرينڭ يوقارى قسمنده بتون قرآنده سكسان و آشاغى قسمنده ينه لفظۀِ جلال بربرى اوستنده سكسان اولوب توافق ايدهرك گلمهسى و صحيفهلر آرقهسنده تام موافقتله بربرينى گوسترمسى، عادتا سكسان عدددن بر تك لفظۀِ جلال تظاهر ايتمهسى.. هم آخركى سطرڭ تام اورتهسنده أللى بش و باشنده يگرمى بش، برابر ينه سكسان ايدهرك؛ بو سكسان، او ايكى سكسانه سكسانلكده توافق ايتدكلرى گبى، ايكى يوز قرق توافقاتِ لطيفه يالڭز صحيفهنڭ آخركى سطرلرنده بولونماسى گوسترييور كه؛ قرآنِ عظيم الشانڭ هم آياتى، هم كلماتى، هم حروفاتى هر برى، آيرى آيرى مدارِ إعجاز اولدقلرى گبى، كلماتڭ نقشلرى و خطلرى دخى آيرى بر شعلۀِ إعجازه مظهر اولديغنى بيان ايدر.