هم قرآنڭ درت أساسندن أڭ بيوگى اولان توحيدى، يگرمى بشنجى سوزده إثبات ايديلديگى گبى، آلتى جملهسيله توحيدڭ آلتى مرتبهسنى إثبات و آلتى أنواعِ شركى ردّ ايدهرك هر بر جملهسى اوتهكى جملهلره هم نتيجه، هم مقدّمه اولديغى جهتله، سورۀِ إخلاص ايچنده اوتوز سورۀِ إخلاص قدر متسلسل برهانلرله مدلّل اوتوز سوره مندرج اولديغندن، بو كوچك سوره نه قدر معظّم بر بحرِ توحيد اولديغنى گوسترييور. حروفاتڭ لطيف مناسباتنى بوڭا قياس ايديڭز كه؛ ايچنده ألف بش، واو بش، دال بش اولارق بربرينه توافقى و لفظ اللّٰهڭ بش حرفنه موافقتى و مجموعِ حروفى آلتمش يدى اولوب لفظ اللّٰهڭ مقامِ أبجديسنه توافق ايتمكله، معنًا مقامِ أبجديسيله دخى اللّٰه ديديگى گبى؛ هـ درت، م درت، نون تنوين ايله درت اولارق بربرينه توافقى و سورهنڭ درت آيتنه توافقى لطافتنى و إنتظامنى گوسترييور.
فاتحۀِ شريفه حروفاتنڭ أبجدى حسابى اولان (اون بيڭ ايكى يوز اون ايكى) عددى مجموعِ قرآنده بانڭ اون بيڭ، هم تانڭ اون بيڭ عددِ تكرّرلرينه توافقى، هم فاتحهنڭ اون بيڭ عددى يدى عدد آيتنه ضرب ايديلمهسيله مجموعِ كلماتِ قرآنيه عددى اولان يتمش بيڭه موافق گلمهسيله أهلِ حقيقت عندنده محقّق و حديثجه مصدّق اولان فاتحه قرآن قدردر، اوڭا مساويدر و قرآن فاتحهده مندرجدر.
﴿السبع المثانى و القراٰن العظيم﴾
فاتحهدر دييه اولان مشهور حكمڭ إثباتنى ايما ايدوب إخطار ايدر.
سُوَرِ قرآنيهنڭ باشلرنده اولان مقطّعاتِ حروف غايت معنيدار و أسرارلى بر شفرۀِ إلٰهيه اولديغى گبى، فاتحه حروفى بلكه قرآنڭ عموم حروفاتى قدسى و آيرى آيرى متنوّع بيڭلر إلٰهى شفرهلر اولديغنى رموزاتِ ثمانيهيه دقّت ايدنلر حسّ ايدهبيلير. و بِالخاصّه فاتحۀِ شريفهنڭ حروفى داها ظاهر و نورانى بر شفره اولديغنى أهلِ كشف گورمشلر و أمارهلرى ده واردر.