اوچنجى مبحثى:
﴿يَٓا اَيُّهَا النَّاسُ اِنَّا خَلَقْنَاكُمْ مِنْ ذَكَرٍ وَاُنْثٰى وَجَعَلْنَاكُمْ شُعُوبًا وَقَبَٓائِلَ لِتَعَارَفُوا﴾
آيتنڭ، حياتِ إجتماعيۀِ بشريهنڭ مناسباتنه دائر غايت مهمّ بر سرّينى و إنسانلر، ملّت ملّت و قبيله قبيله ياراديلماسنڭ مهمّ بر حكمتنى يدى مسئله ايله تفسير ايدييور.
بو مبحث، ملّيتجيلره مهمّ بر ترياقدر. بو زمانڭ أڭ مدهش مرضنه غايت نافع بر علاجدر. و ساختهكار حميتفروشلرڭ و يالانجى ملّيتپرورلرڭ يوزلرندهكى پردهيى آچار، ساختهكارلقلرينى گوسترر.
دردنجى مبحثى:
آلتى سؤالڭ جوابنده «اون مسئله»در.
برنجيسى: «ربّ العالمين» كلمهسنڭ تفسيرنده اون سكز بيڭ عالم ديدكلرينڭ حكمتى مناسبتيله، بر قاچ نكتۀِ قرآنيه بيان ايديلير.
ايكنجى مسئله: «اللّٰهى بيلمك، وارلغنى بيلمهنڭ غيريدر» محيى الدينِ عربى، فخر الدّينِ رازىيه ديمش. اوندن مراد نهدر؟ جوابنده، غايت مهمّ بر مسئلۀِ معرفت اللّٰه بيان ايديلمشدر.
اوچنجى مسئله:
﴿وَلَقَدْ كَرَّمْنَا بَنٖى اٰدَمَ﴾
آيتيله
﴿اِنَّهُ كَانَ ظَلُومًا جَهُولًا﴾
آيتنڭ وجهِ توفيقى نهدر؟ دييه سؤالنه، غايت گوزل و نورلى مهمّ بر جوابدر.
دردنجى مسئله:
﴿جَدِّدُوا اٖيمَانَكُمْ بِلَا اِلٰهَ اِلَّا اللّٰهُ﴾
حكمتى نهدر؟ دييه سؤاله، غايت گوزل و نورلى بر جوابدر.
دردنجى مسئلهنڭ ذيلنده، وحدانيتڭ غايت عظيم بر حجّتنه و گنيش و اوزون بر برهاننه مختصر بر إشارتدر.
بشنجى مسئله: «يالڭز «لَا اِلٰهَ اِلَّا اللّٰهُ» ديين، «مُحَمَّدٌ رَسُولُ اللّٰهِ» ديمهين أهلِ نجات اولابيلير مى؟» سؤالنه قارشى مهمّ بر جوابدر.