عناصرِ كلّيهنڭ ظاهرًا تصادفى ظن ايديلن وضعيتلرندهكى إنتظامِ مخفى و چيچكلر و ميوهلر و قوشلر گبى أنواعڭ شكللرندهكى حِكَمِ خفيهنڭ إظهارى جهتيله غايت گنيش و پارلاق بر دليلِ وحدانيت گوسترمكله تفسير ايدييور.
يگرمى برنجى پنجره:
﴿وَالشَّمْسُ تَجْرٖى لِمُسْتَقَرٍّ لَهَا ذٰلِكَ تَقْدٖيرُ الْعَزٖيزِ الْعَلٖيمِ﴾
آيتنڭ بر حقيقتنى؛ شو كائناتڭ لامباسى اولان گونش، كائنات صاحبنڭ وجود و وحدانيتنه گونش گبى پارلاق و نورانى بر حجّت اولديغنى گوسترمكله تفسير ايدييور.
يگرمى ايكنجى پنجره:
﴿اَلَمْ نَجْعَلِ الْاَرْضَ مِهَادًا ۞ وَالْجِبَالَ اَوْتَادًا ۞ وَخَلَقْنَاكُمْ اَزْوَاجًا ۞ فَانْظُرْ اِلٰٓى اٰثَارِ رَحْمَتِ اللّٰهِ كَيْفَ يُحْيِى الْاَرْضَ بَعْدَ مَوْتِهَا﴾
آيتلرينڭ حقائقندن بر حقيقتنى، كُرۀِ أرضڭ وضعيت و حركتنده و يوزندهكى متماديًا كمالِ حكمت و ميزان ايله يوز بيڭلر أجناسِ نباتات و أنواعِ حيوانات ايله شنلنديروب طولديروب بوشالتمق جهتيله بر واجب الوجودڭ وحدتنه شهادت ايتدكلرى صورتنده كُرۀِ أرض قوّتنده بر حجّتِ وحدانيتى گوسترمكله تفسير ايدييور.
يگرمى اوچنجى پنجره:
﴿اَلَّذٖى خَلَقَ الْمَوْتَ وَالْحَيٰوةَ﴾
آيتنڭ بر حقيقتنى، حيات وحدانيتِ إلٰهيه برهانلرينڭ أڭ قوّتليسى و أڭ پارلاغى و تجلّياتِ صمدانيه آيينهلرينڭ أڭ جامعى، أڭ برّاقى اولديغى جهتنده حىّ قيّومى أسماء و شئوناتيله بيلديرر بر حجّتِ قاطعه اولديغنى گوسترمكله تفسير ايدييور.
يگرمى دردنجى پنجره:
﴿لَٓا اِلٰهَ اِلَّا هُوَ كُلُّ شَىْءٍ هَالِكٌ اِلَّا وَجْهَهُ لَهُ الْحُكْمُ وَاِلَيْهِ تُرْجَعُونَ ۞ هُوَ الَّذٖى يُحْيِى وَيُمٖيتُ﴾
آيتلرينڭ موته دائر بر