اون اوچنجى إشارت:
«اوچ نقطه»در.
برنجيسى: شيطانڭ أڭ بيوك بر دسيسهسى، حقائقِ ايمانيهنڭ عظمتى جهتنده، طار قلبلى و قيصه عقللى و قاصر فكرلى إنسانلرى آلداتمهسنه مقابل، تماميله شيطانِ جنّى و إنسىيى ده صوصديرهجق بر جوابدر.
ايكنجى نقطه: شيطان، قصورلى إنسانه قصورينى إعتراف ايتمهمك ايله إستغفار و إستعاذه يولنى قپايوب، أنانيتى تحريك ايدهرك، آووقات گبى، نفسنى مدافعه ايتديرر. عادتا نفسنى تقصيراتدن تقديس ايتديرمسنه مقابل، هركسى إقناع ايدهجك بر جوابدر. قصورينى گورمهمك، او قصوردن داها بيوك بر قصور بولونديغنى و قصورينى گورمك، قصورى قصورلقدن چيقارمق اولديغنى بيان ايدر.
اوچنجى نقطه: إنسانڭ حياتِ اجتماعيهسنى إفساد ايدن أڭ مهمّ بر دسيسۀِ شيطانيه؛ «مؤمنڭ بر تك سيّئهسيله حسناتنى اورتمك» ايله او مؤمنه قارشى عداوت ايتديرمگه مقابل، ميزانِ أكبرده عدالتِ مطلقۀِ إلٰهيهنڭ تجلّيسندهكى دستور ايله؛ هركسه لزوملى، خصوصًا حديد المزاج و مشكلپسند إنسانلره، قيمتدار و حقلى و قوّتلى بر جوابدر.
ايشته شو رساله اون اوچ إشارت ايله شيطانِ إنسى و جنّينڭ اون اوچ هجوم يوللرينى قپاديغى گبى؛
﴿قُلْ اَعُوذُ بِرَبِّ النَّاسِ﴾
سورهسنڭ قلعۀِ متيننده تحصّن ايتمك ايچون اون اوچ آناختار اولوب، اون اوچ قپويى أهلِ ايمانه آچار.
شو حكمت الإستعاذه رسالهسنڭ ايكى مهمّ قارداشى وار. بريسى يگرمى طوقوزنجى مكتوبڭ آلتنجى رسالهسى اولان «هجماتِ ستّه»، مهمّ بر قلعه اولديغى گبى؛ ايكنجى بر قارداشى اولان يگرمى آلتنجى مكتوبڭ «حجّة القرآن على