أوت أنا، زمانِ آدمدن شيمدى يه قدر عالمِ إنسانيتڭ أطرافنه دال بوداق صالان نورانى بر شجرۀِ طوبٰى ايله، مدهش بر شجرۀِ زقّومڭ چكردگيدر. شو عظيم حقيقته گيريشمه‌دن أوّل، او حقيقتڭ فهمنى تسهيل ايده‌جك بر مقدّمه بيان ايدرز. شويله كه:
أنا، كنوزِ مخفيه اولان أسماءِ إلٰهيه‌نڭ آناختارى اولديغى گبى، كائناتڭ طلسمِ مغلقنڭ دخى آناختارى اولارق بر معمّاىِ مشكل‌كشادر، بر طلسمِ حيرت‌فزادر. او أنا ماهيتنڭ بيلنمسيله، او غريب معمّا، او عجيب طلسم اولان أنا آچيلير و كائنات طلسمنى و عالمِ وجوبڭ كنوزينى دخى آچار. شو مسئله يه دائر «شَمَّه» إسمنده بر رسالۀِ عربيه‌مده شويله بحث ايتمشز كه: عالمڭ مفتاحى إنسانڭ ألنده‌در و نفسنه طاقيلمشدر. كائنات قپولرى ظاهرًا آچيق گورونوركن، حقيقةً قپاليدر. جنابِ حق، أمانت جهتيله إنسانه «أنا» نامنده اويله بر