خدمتنده بز بولونديغمز حالده، ضرورت اولمادن باقهمييورز. بونڭ سرّ و حكمتنى قطعيًا آڭلادق كه:
رسالۀِ نورڭ أساس مسلگى حقيقى إخلاص اولمق جهتيله شيمديكى تظاهر، صحبت ايتمك، فضله حرمت ايتمك؛ بو أنانيت زماننده بر نفسپرستلك، رياكارلق، تصنّع علامتى اولمق جهتيله اوڭا شدّتله طوقونويور. چونكه دير: «بنمله گوروشمك ايستهين، أگر آخرت ايچون، رسالۀِ نور ايچون ايسه؛ رسالۀِ نور بڭا قطعيًا إحتياج بيراقمامش. ميليونلر نسخهسى هر بريسى اون سعيد قدر فائده ويرييور. أگر دنيا جهتيله و دنيايه عائد ايشلر ايچون گوروشمك ايسه: او، دنيايى شدّتله ترك ايتديگى ايچون، دنيايه دائر شيلرى مالايعنى، وقتى ضايع ايتمك اولديغى ايچون جدًّا صيقيلير. أگر رسالۀِ نورڭ خدمتنه، إنتشارينه عائد اولسه؛ بڭا خدمت ايدن حقيقى فداكار طلبهلرم و معنوى أولادلرم و قارداشلرم بنم بدلمه گوروشمهلرى كافى، بڭا هيچ إحتياج يوق. اوزون يرلردن اوزاق مملكتلردن گلنلرله برابر باشقه قارداشلريمزڭ ده خاطرلرى قيريلماسين. چونكه، اون سنهدن بريدر هر صباح اوقوديغى و باشقهلرى اونى توكيل ايتديگى أوراد اوقوماسنده ثوابى باغيشلاديغى وقت دير كه:
«يا ربّى! بنمله گوروشمك ايچون گلوب گوروشمهدن دوننلرڭ دفترِ أعمالنه ده يازيلسين.» دييه روحلرينه هديه ايدييور. استاديمزڭ بو حالنى قارداشلريمزه بيان ايدييورز.
اَلْبَاقِى هُوَ الْبَاقِى
خدمتنده بولونان نور طلبهلرى
* * *