ده؛ قيصرى قضالرندن اورگوب مفتيسى قارداشم عبد المجيده يازسينلر كه، يگرمى سنه بتون قوّتيله نوره خدمت ايتمك اوڭا لازم ايكن ايتمديگى ايچون، اونڭ بدلنه بتون قوّتيله عربجهيه ترجمه ايتسين. برى ده، إسپارطه حواليسنده نور دائرهسندهكى عالملر دخى عصاىِ موسىيى تقسيم صورتنده هر برى بر قسمنى ترجمه ايتسينلر.
* * *
عزيز، صدّيق قارداشلرم!
أوّلا: أڭ بيوك مژده و رسالۀِ نورڭ تام سربستيتنه بر مقدّمه اولارق، چوق زياده بشارتڭزه سَويندك. إسپارطه عدليهسنڭ اوچ سنه بر منزلده صاقلامالرى، او منزلڭ كراسى اولارق او اوچ يوز ليرا بدلنه، يڭى يازى تاريخچۀِ حياتى بڭا بيراقيلان بشيوزدن ايكيشر ليرا فيآت ايله او اوچ يوز ليرايه او فيآتى مقابل طوتهرق او تاريخچۀِ حياتدن أللى دانه گوندررسڭز. درت سنه حپس چكن مبارك عصاىِ موسى و ذوالفقار مجموعهلرى بنم نظرمده پك فضله قيمتدار اولديغى ايچون بڭا أللى ليرالق گوندريڭز. سزه شيمدى أللى ليرا گوندرييورم.
ثانيًا: نظيفه بيڭ بارك اللّٰه، بيڭ ما شاء اللّٰه. ايكنجى بر خسرو، اينهبولى ايكنجى بر إسپارطه اولديغنى إثبات ايدييور. تاريخچۀِ حياتڭ أڭ مهمّ مسئلهسى مدرسة الزهرا اولماسى جهتيله نظيفڭ بو نشرياتى، رئيسِ جمهورڭ مدرسة الزهرا معناسنده و طوغو اونورسيتهسى نامنده شرق جامع الأزهرينه جدّى چاليشماسنه بر وسيله اولديغنى ظن ايدييورز.
ثالثًا: دينارڭ براقلى إمامى سليمانڭ أهمّيتلى مكتوبنه قارشى يازيڭز كه: توركلر حقّنده ثناءِ پيغمبرى محقّقدر. بر قاچ يرده توركلردن أهمّيتله بحث ايتمش.