پاكستانده چيقان «الصدّيق» نامندهكى مهمّ بر مجموعه ألمزه گچدى. باقدق كه؛ أللى صحيفهلك او مجموعهنڭ ياريسنه ياقين قسمى رسالۀِ نورڭ بعض مقالهلريدر. و بِالخاصّه باشنده رسالۀِ نوردن يگرمى ايكنجى مكتوبڭ برنجى مبحثنى غايت أهمّيتله و تقدير ايله عالمِ إسلامه (اِنَّمَا الْمُؤْمِنُونَ اِخْوَةٌ) آيتنه بر دعوتنامه حكمنده يازديغنى گوردك. شيمدى او عربى مجموعهنڭ ترجمه ايتديگى رسالهنڭ أصلى اولان توركجهسنى أفكارِ عامّهيه، خصوصًا بو حكومتِ إسلاميهنڭ رئيسلرينه و مبعوثلرينه بر سنه أوّل ويريلديگى گبى، ينه براىِ معلومات تقديم ايتمك ايچون ايكى اوچ سبب وار:
برنجيسى:
رسالۀِ نوردن سكّۀِ تصديقِ غيبى مجموعهسنده يازيلان قطعى يوزر إشاراتڭ و أماراتڭ دلالتيله و چوق حادثهلرڭ او دلالتى تصديقى ايله ثابت اولمش كه:
رسالۀِ نور، معنوى تخريباته و آنارشيلك و بولشويزم، طبيعيّون و مادّيونلغه و شكوك و شبهاته و كفرِ مطلقه قارشى بر سدِّ قرآنى خدمتنى بِحَقٍّ ايفا ايتمهسيله بو وطنى بو تهلكهلى دنيا فورطنهسى ايچنده محافظهيه بر وسيله اولديغى و بر صدقۀِ مقبوله حكمنه گچوب ايكنجى حربِ عمومينڭ بلاسنه و باشقه مملكتلرده وقوع بولان بلالرڭ بو مملكته گيرمهسنه ممانعتله معنوى بر سپر تشكيل ايتديگى بداهتله آشكار اولمشدر. بو مدّعايى رسالۀِ نوره نظر ايدن أڭ معنّد فيلسوفلر ده تصديق ايتمگه مجبور قالمشلردر. ايشته او رسالۀِ نور بش يوز بيڭ طلبهسيله و آلتى يوز بيڭ نسخهسيله هركسڭ قلبنده ايمان درسيله بر ياساقجى بيراقوب آسايشى تأمين ايتمكله، (وَلَا تَزِرُ وَازِرَةٌ وِزْرَ اُخْرٰى) يعنى برينڭ گناهيله باشقهسى مسئول اولاماز دييه اولان قرآنڭ بر قانونِ أساسيسنى تطبيقه چاليشماسيله و ميليونلرله