قارداشلغى حسّ ايدهميهجك. شيمدى بو قدر دشمنلره قارشى تعاون و تسانده مجبورز.
شيمدى بن زهر خستهلغى ايله زياده راحتسز وضعيتده و چوق إختيارلق سببيله أللى بش سنهلك بر غايۀِ حياتمى گوروب تعقيب ايتمكدن محروم قالديغم گبى، آنقرهيه گيدوب شرق ترقّياتنڭ آناختارى اولان بو مؤسّسهيه چاليشانلرى روح و جانمله تبريك ايتمكدن دخى محروم قالييورم.
يالڭز اوتوز بش سنه أوّل أبو الضيا مطبعهسنده طبع ايديلن مناظرات و صيقل الإسلاميه نامندهكى أثرم ألبته معارف وكيلنڭ نظرندن قاچمامش. بنم بدلمه او أثر قونوشسون. بن حياتمدن اميدم كسيلمش گبىيم. فقط او عظيم اونورسيتهنڭ تمللرى و أساساتى و معنوى بر پروغرامى و معظّم بر تدريساتى نوعندن رسالۀِ نورڭ يوز أللى رسالهسنى كنديمه توكيل ايدييورم. بو وطن و ملّتڭ إستقبالنڭ فداكار گنج اونورسيته طلبهلرينه و معارف دائرهسنه عرض ايدوب بو مسئلهده موفّقيته مظهر اولان توفيق ايلرينڭ بو بيچاره سعيده بدل رسالۀِ نوره حمايتكارانه صاحب چيقماسنى رحمتِ إلٰهيهدن نياز ايدييورم.
اَلْبَاقِى هُوَ الْبَاقِى
چوق خسته، چوق إختيار، غريب، تجريد ايچنده
سعيد النورسى
* * *