﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق، فداكار قارداشمز حاجى على!
گوندرديگڭز قيمتدار و بِالخاصّه حضرتِ استادى پك چوق سَوينديرن مكتوبڭزى آلدق. استاديمز دييور كه:
«رسالۀِ نور، بو زمانده كافيدر. اون سنه مدرسهده اوقويانلر، رسالۀِ نورله بر سنهده عين إستفادهيى ايتدكلرينه شاهد، بيڭلر أهلِ علم وار. مادام حاجى قلنج على بر بچق سنه بتون رسالۀِ نور أجزالرينه صاحب چيقمش، قسمًا اوقومش؛ نظريمزده يگرمى سنهلك بر نور طلبهسيدر. بن هر صباح خاصلر ايچنده اونڭ إسميله بتون معنوى قزانجلريمه، دفترِ أعمالنه گچمك ايچون حصّهدار ايدييورم. اويله ايسه، او ده بتون حياتنى رسالۀِ نوره ويرمگه مكلّفدر. ديمك شيمدىيه قدر جامع الأزهره گيتمگه موفّق اولمامسى أهمّيتلى بر حكمت ايچوندر كه، نورلر اوڭا كافى ايمش. شيمدى شامه، حلبه ياقين اولان اورفهده بر مدرسۀِ نوريه ايلريده تشكّل ايتمهسنى قوّتلى اُميد ايدييورز. قلنج على ايله برابر أسكى سعيدڭ غايت قيمتدار بر طلبهسى اولان شامدهكى منلا عبد المجيد، اورفهدهكى نورڭ طلبهلرندن سيّد صالح و اونڭ ياننه گيدن نورڭ فداكار بر طلبهسيله مخابره ايتسينلر. بن هم منلا عبد المجيده، هم حاجى علىيه، هم شامدهكى رسالۀِ نورله علاقهدار اولانلره پك چوق سلام ايدييورم. و دعالرينى و او موقعِ مباركهده بڭا دعا ايتمهلرينى رجا ايدييورم.» ديدى.