حقيقةً نه قدر آجيدر كه: آسايشڭ تأميننه، أخلاقڭ محافظهسنه وسيله اولمش، عدليهيه و ضابطهيه بيڭلر فائدهسى بولونمش بر أثر، بوگون حقيقتڭ تمامًا عكسنه اولارق صوچلى گوستريلوب ضررلى توهّم ايديلمك ايستهنييور. آرتيق بو قدر بديهى بر ضدّيت قارشيسنده إنصاف و وجدان صاحبلرينڭ وجدانلرينه و إنصافلرينه حواله ايدوب استاديمز حقّنده او أهلِ وقوفڭ؛ دينى سياسته آلَت ايدييور ديمهلرينه مقابل بز ده دييورز: او أهلِ وقوف، عدليهيى دينسزلگه آلَت ايدييور.
بيليركيشى راپورنده بر إسناد ده؛ مؤلّف، رسالۀِ نور شخصِ معنويسى نامنه قونوشمقدهدر. قلبه إخطار ايديلدى، ليلۀِ قدرده قلبه گلن بر مسئلۀِ مهمّه گبى بعض جملهلرى أله آلارق بونڭله شخصى نفوذ تأمين ايتمك مقصدينڭ مؤلّفده بولونديغيدر.
بو قدر أصلسز و معناسز بر إسناد قارشيسنده إنسان، او بيليركيشى نامنى آلانلرڭ بيليركيشى ماهيتندن تمامًا اوزاق اولدقلرينه حكم ايدوب او جهالتلرى و او وقوفسزلقلرى قارشيسنده حيرتده قالييور. هيچ اولمازسه، أهلِ وقوف، حرمةً بو جهتى دقّتله مطالعه ايتسه ايديلر، كنديلرى بو درجه جهالت درهسنه آتيلمقدن بلكه بر درجه قورتولورلردى. بو أصلسز إسناده قارشى أوّلا: بتون رسالۀِ نور أثرلرى و مكتوبلرى و استاديمزڭ بتون حياتى أڭ قطعى دليلدر كه؛ او عزيز ذات بتون غيرتنى، بتون خدمتنى حق اوغرنده و يالڭز حق ايچون ياپمش و يالڭز حقّڭ خاطرى ايچون قونوشمش. او صورتا أهلِ وقوف، نور كلّياتندن يالڭز كوچك بر جزئنى اوقومقله و دينسزلكده تعصّب گوسترهرك إلاّ كه بر صوچ إسناد ايدهبيلمك ايچون بو إفترايى صاوورمشلر. حالبوكه او عزيز ذات، رسالۀِ نور درسنى ايضاح ايدركن دييور: أڭ بيوك درسمز؛ عجز، فقر، شفقت و تفكّردر.