دستورلريله بيڭ سنهدن بَرى ميليونلر أجداديڭزى نورلانديران و أبدى سعادته سَوق ايدن قرآنڭز نامنه و او دستورِ قرآنه إتّباع ايدن يوزر ميليون أجداديڭز نامنه، أخلاقِ حسنه و ناموس محافظهسى يولنده إسلامى تربيهنڭ ضياسيله نورلانان و تربيه آلان و قادينلغڭ حقيقى معناسنى و حقيقى گوزللگنى ياشايشلريله و گيينشلريله و حياتلريله گوسترن آننهلريڭزڭ و ننهلريڭزڭ و همشيرهلريڭزڭ نامنه او مفتريلره، او تزييف و تحقير صاوورانلره تأسّفڭزى، تكديريڭزى و ردّيڭزى بيلديريڭز.
ايشته او مفتريلر، ياشى سكسانى بولمش، زهرلردن شدّتلى خسته، دينى خدمتندن طولايى عمرى حپسخانهلرده چوروتولمش بر إسلام قهرمانڭز؛ شيمدى بتون منوّرلرڭ و چوق أديبلرڭ و تربيهجيلرڭ، وطن و ملّتپرورلرڭ شكايت ايتدكلرى أخلاقسزلغڭ و فحش تهلكهسندن محافظه ايچون گنجلره ايى أخلاق، يوكسك ناموس، ايمان و فضيلت درسى ويرن، وطنه ملّته بر عضوِ نافع حالنه گلمهلرينى تأمين ايدن، عدالت و آسايش لهنده أڭ برنجى قوّت اولارق مملكت و ملّتڭ سعادتنه خدمت ايدن گنجلك رهبرى آدلى أثرينڭ مصادرهسنه و مؤلّفِ محترمنڭ محكوميتنه سبب اولمق ايچون دييورلر:
بديع الزمان تستّر طرفداريدر. قادينلرڭ يارى چيپلاق، آچيق طولاشمالرينه، إسلاميته قارشى محاربهده شيطان قومانداسنه ويريلن فرقهلر اولارق تصوير ايتمكده؛ قادينلرڭ بوگونكى إجتماعى حياتده آچيق باجاق و ياريم چيپلاق گيينمهلرينى گناه صايمقده، بديع الزمان حالِ حاضر بو آچيق، ياريم چيپلاق گيينشلرى أولنمهلره مانع اولوب فحشه تشويق ايديجى ماهيتنده گورمكدهدر. و ينه بديع الزمانه گوره، قادينى گوزللشديرن شى و قادينڭ حقيقى و دائمى گوزللگى إجتماعى حياتده ير آلان سوسلنمك، وجودلرينى تشهير ايتمك اولمايوب، تربيۀِ إسلاميه دائرهسنده آدابِ قرآنيه زينتيدر. بديع الزمان دينى تدريسات طرفداريدر. رسالۀِ نور آدى ويرديگى دينى تدريسات