بش سنهدن بَرى تنفّس ايچون أميرطاغنڭ أطرافنده فايطونله گزديگم زمان غريب بر طرزده، بر ياشندن يدى ياشنه قدر كوچوجك چوجقلر والده و پدرلرينه قارشى گوستردكلرى علاقهدن زياده بر إشتياقله فايطونمه قوشوب أليمه صاريلييورلردى. حتّى بر ايكى دفعه فايطون آلتنه دوشوب خارقه بر طرزده ضرر گورمهدن قورتولديلر.
حتّى هيچ بنى گورمهين، بيلمهين بر و ايكى، اوچ ياشنده چوجقلر يالين آياق تيكنلر ايچنده قوشه قوشه فايطونه يتيشييورلر. بيوك آدملر گبى تمنّا ايدوب ألڭزى اوپهلم ديرلردى. بو حاله هم بن، هم قارداشلرم و گورنلر حيرت ايدييوردق. بو حال بر محلّهيه مخصوص دگل، هر طرفده حتّى كويلرنده عين حال دوام ايدييوردى.
بنى آلداتميان بر خاطرۀِ حقيقت ايله بنم و آرقداشلريمڭ قناعتمز گلدى كه؛ بو معصوم طائفهنڭ معصوميتلرى جهتيله، سَوقِ فطرى دينيلن بر حسِّ قبل الوقوع ايله، رسالۀِ نورڭ بو مملكتده معصوم چوجقلره و كنديلرينه چوق منفعتى اولاجق دييه، عقل و فكرلرى درك ايتمديگى حالده، او معصومانه حسّ ايله رسالۀِ نورڭ معناسى إعتباريله ترجماننه، آننهسنه يالوارمسندن زياده بر إشتياق ايله قوشويورلردى.
بز ده بر حسِّ قبل الوقوع ايله حسّ ايدييورز كه، ايلريده بو كوچك معصوم مخلوقلرده بيوك نورجيلر چيقهجق و ايلريده نورڭ خاص شاكردلرى اولاجق كه، بو وضعيتى گوسترييورلر.