غايت گوزلجه تدقيق ايدوب مصحّح اولارق بزه إعاده ايتمش. إن شاء اللّٰه ياقينده بو قرآنمز باصيلارق، بر هديۀِ نوريه اولارق عالمِ إسلامه نشر ايديلهجكدر.
او كندينى بيلديرمهين ذاتڭ شبهه ايتديگى ايكنجى مسئله: پك چوق نورجيلرڭ حدّمدن يوز درجه زياده حسنِ ظنلريله بندن ظن ايتديگى مدارِ إفتخار صفتلرى يوز دفعه اونلرڭ خاطرلرينى قيروب ردّ ايتمشم. فقط يگرمى سكز سنه سياستجيلر، رسالۀِ نورڭ صِرف ايمانى و اُخروى مسلگنى شيمديكى مدنيلشمك فكرلرينه مساعد گورمدكلرندن يگرمى سكز سنهدر حپسلرله، محكمهلرله، ترصّدلرله، أصلسز إسنادلرله نورجيلرى اوركوتمكله و بنى چوروتمك جهتيله رسالۀِ نورى نشر ايتديرمهمك ايچون أمثالسز بر وضعيته دوشمشدم. ياريم اُمّى و إتهام آلتنده و نور شاكردلرينى بتون بتون قاچيرمامق ايچون بڭا قارشى مدحى، شخصمدن ردّ ايدوب مدحڭز نورلره عائد اولابيلير. و گورديگڭز مزيتلر بنم دگل رسالۀِ نورڭدر. او ده قرآنِ حكيمڭ بر حقيقتنڭ بر تفسيريدر. و هر عصرده دينه و ايمانه تام خدمت ايدن مجدّدلر گلدكلرى گبى، بو عجيب و قوميتهجيلك و شخصِ معنوئِ ضلالتڭ تجاوزى زماننده بر شخصِ معنوى مجدّد اولمق لازم گلير. أسكى زمانه بڭزهمز. شخص نه قدر ده خارقه اولسه، شخصِ معنوىيه قارشى مغلوب اولمق قابلدر. رسالۀِ نورڭ او جهتده بر نوع مجدّد اولماسى قويًا محتمل اولديغندن او صفتلر، حاشا بنم حدّم دگل؛ بلكه مكرّر يازديغم گبى، بنم حياتم رسالۀِ نوره بر نوع چكردك اولابيلير. قرآنڭ فيضيله جنابِ حقّڭ إحسانيله او چكردكدن رسالۀِ نورڭ ميوهدار، قيمتدار بر آغاج حكمنه ايجادِ إلٰهى ايله گچمهسيدر. بن بر چكردكدم، چورودم گيتدم. بتون قيمت قرآنِ حكيمڭ معناسى و حقيقتلى تفسيرى اولان رسالۀِ نوره عائددر.
كندينى بيلديرمهين ذاتڭ اوچنجى شبههسى: بيوك جهادڭ و سبيل الرّشادڭ نشر ايتديگى گبى بن إعلان ايتمشم كه؛ دينه، ايمانه خدمتى و رسالۀِ نورى دگل