بوگون سزى تبريك و سزه تشكّر ايچون آفيونه گلدم. چوقدن بَرى كتابلريمزڭ ضايع اولمامسى ايچون زياده محافظه ايتديگڭزه تشكّر ايدرم. و شيمدى آنقرهيه گوندرهجگڭزدن سزى تبريك ايدرم. اون سنه أوّل خصوصى اولارق بريسنڭ بريسنه يازديغى و بعضًا ده بنم ناممله يازيلوب إمضام بولونميان و نشر اولمايان خصوصى مكتوبلر أوّلجه محكمهڭزجه تدقيق ايديلوب مدارِ مسئوليت بر شى بولونماديغندن نظرِ إعتباره آلينمادى. هم مرورِ زمانه اوغرامش و نشر ايديلمهمش و عفو قانونلرى گورمش، معلوماتم اولمامش و رسالۀِ نور كتابلريله علاقهسى اولميان مكتوبلرى، يڭيدن نظرِ دقّته آلمق، هم أهلِ عدالتى هم أهلِ وقوفى لزومسز مشغول ايدهجگندن بويله إشغال ايتمهمسى و ايشمزڭ تأخيره اوغرامهمسى ايچون مذكور خصوصى مكتوبلرم او مبارك كتابلره طاقيلمامسى عدالتڭزدن تمنّى ايدييورز.
بو مبارك عدليه ايكى دفعه او كتابلرڭ برائتله إعادهسنه قرار ويرديگى حالده، بعض أسبابه بناءً محبوس قالمش عين كتابلرى بعضًا تمامنى، بعضًا أله گچيريلن قسمنى بش محكمهنڭ إعاده ايتدكلرينى و بش أمنيت دائرهسى ده صاحبلرينه تسليم ايتدكلرينى سزه خبر ويرييورز. إن شاء اللّٰه عدالتڭز و حسنِ نيّتڭز بو دفعه ده إعادهسنه وسيله اولاجق.
خسته
سعيد النورسى
* * *