ثالثًا: «حشردهكى محكمۀِ كبرايه شكوا» نامندهكى و يگرمى سكز سنه أوّل مجلسِ مبعوثانه خطابًا يازيلان و او وقت طبع ايديلن اون مادّهلك نمازه دائر پارچه و بر ده مصطفى حقّنده درت سنه أوّل رئيسِ جمهوره يازيلان اوچ مادّهلك پارچه، شيمدى بو زمانده آنقرهده بعض مبعوثلرڭ نظرينه و ايمانلى حكومت أركاننه گوسترمك نيّتيله آنقرهيه گوندريلمش. سزه ده براىِ معلومات گوندرييورز.
رابعًا: دينار براقلى كويندن محمد چاوش و قارداشى بر آدمله برابر يانمه گلديلر. پك جدّى گوردم. صوڭره بڭا بر مكتوبنده بر شى يازييور و بر پارچه مكتوبنى لفًّا گوندرييورم. بو قارداشمز بعض شيلر صورويور. رسالۀِ نور سؤاللره إحتياج بيراقمييور و بنم بدلمه هر شيئه جواب ويرييور. يالڭز چوجق تعزيهسنه دائر رسالهده (يَطُوفُ عَلَيْهِمْ وِلْدَانٌ مُخَلَّدُونَ) يه دائر سؤالنده بر قسم أسكى تفسيرلر ديمشلر: «جنّتده چوجقدن غايت إختياره قدر هركس اوتوز اوچ ياشنده اولاجق.» بونڭ حقيقتى اللّٰه أعْلَمُ شو اولاجق كه: صريح آيت (وِلْدَانٌ) تعبيرى إفاده ايدر كه، فرائضِ شرعيهيى ياپمغه مجبور اولميان و مسنونيت جهتيله ده ياپميان و قبل البلوغ وفات ايدن چوجقلر جنّته لايق و سَويملى چوجق اولارق قالاجقلر. فقط شرعًا يدى ياشنه گلن بر چوجغه نماز گبى فرضلره پدر و والدهلرى اونلرى آليشديرمق ايچون، تشويقكارانه أمر ايتمك و اون ياشنه گيرسه شدّتله نماز قيلديرمق و آليشديرمق شريعتده وار. ديمك واجب اولماديغى حالده، نافله نوعندن يدى ياشندن حدِّ بلوغه قدر بيوكلر گبى نماز قيلوب، اوروج طوتان چوجقلر، متديّن بيوكلر گبى بيوك مكافاتى گورمك ايچون اوتوز اوچ ياشنده اولاجقلر دييه بر قسم تفسير بو نقطهيى ايضاح ايتمهدن عموم چوجقلره تشميل ايتمشلر. خاص ايكن عام ظن ايديلمش.
* * *