﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلرم!
أوّلا: سكسان كسور سنه عبادتلى بر عمرِ باقىيى تأمين ايدن رمضانِ شريفڭزى بتون روح و جانمزله تبريك و هر گيجهسى بر نوع ليلۀِ قدر حكمنده حقّمزده منفعتدار اولماسنى نياز ايدرز. و تشريكِ مساعى سرّيله و هر خاص نورجى، عموم نورجيلرڭ معنوى قزانجنه حصّهدار اولماسيله، معنًا بيڭلر ديل ايله عبادت و دعا و إستغفار و تسبيحات ياپمغه حقيقى اخوّت و إخلاص ايله مظهريتڭزى رحمتِ إلٰهيهدن نياز ايدييورز و اويله ده اُميد ايدييورز.
ثانيًا: رسالۀِ نورڭ معنًا غلبۀِ تامّهسى ايله برابر، ماصون قسمنڭ دينسزلرى و قومونيستلرڭ زنديقلر قسمى، حبّهيى قبّه ياپوب بهانهلرله نورلرڭ سربستيتنه مانع اولمغه چاليشييورلر كه؛ ينه بو دفعه ده معناسز، سببسز اوتوز بش گون محكمهمزى تأخير ايتديلر. حتّى قرآنمزى ويرمهمك ايچون آووقاتمزله ده گورولتى ايتمشلر. فقط عنايتِ إلٰهيه اونلرڭ بتون پلانلرينى عقيم بيراقييور. نورلر كمالِ إحتشامله إستانبول و آنقره منوّر گنجلرنده بيوك بر إشتياقله كندى كندينه إنتشار ايدوب شاكردلرينه درس ويرييور. بو معنوى غلبهسنڭ بر نتيجهسيدر كه، أذانِ محمّدينڭ اوقونماسنه چاليشان باش وكيله يوزر إمضا ايله گنج منوّرلر تشكّر و تبريك يازييورلر.
ثالثًا: بورادهكى طلبهلر ده رمضانِ شريفڭزى تبريكله برابر كنديلرنجه پك چوق نمونهلر ايچنده أسكى قومونيستلرڭ إشكنجهلرندن بر ايكى نمونه يازوب لفًّا سزه تقديم ايدييورلر. بلكه بر وقت بو مئالده غزتهلرده بر مقالهيى ده نشر ايدهجكلر.