هم باشمده شدّتلى و دواملى نزله و بر گوزم او نزلهدن آغرييور و آقييور. مزمِن قولونج و شدّتلى صانجى ايله خستهيم.
هم يگرمى سكز سنه غربتده قالديغمدن و باشقهلرينڭ معاونتنى قبول ايتمديگمدن پك ضرورتده ياشاديغم ايچون ضعفيت فضلهدر. حتّى زورله مرديواندن چيقييورم. ضرورتِ قطعى اولمازسه بش دقيقه قونوشامييورم، يورولييورم.
بن سابق محكمهلرده هم رسالۀِ نور، هم رسالۀِ نور طلبهلرى ايچون تحمّل ايدييوردم. و تام حقيقتى إظهار ايتمييوردم. بر درجه ظلملرينه تحمّل ايدوب حقسزلقلرينى يوزلرينه وورمييوردم. تا معصوملره، آسايشه ضرر گلمهسين دييه صبر و هر نوع ظلم و إشكنجهلره تحمّل ايدييوردم.
شيمدى ايسه رسالۀِ نوره عالمِ إسلام صاحب چيقدى. نور طلبهلرى ده بنم مسامحهمه و دشمنلريمه ايليشمهمكلگمه و ظلملرينه سكوت ايتمهمه إحتياجلرى قالمادى. اونڭ ايچون بنم طماريمه پك شدّتلى طوقونيلديغنده إراده و إختيارم خارجنده قارشيمه چيقان گيزلى دشمنلريمڭ بڭا ضررلرينه وسيله اولان، بنى جزالانديرمغه چاليشانلره حقيقتى چيپلاق اولارق بويله سويلهيهجگم.
سكوت... شيمدى إظهار ايديلميهجك.
مادام حقيقت بويلهدر، هيئتِ صحّيه بنم هم مادّى، هم معنوى، هم سيڭير، هم قلب، هم نزلهلى باش خستهلقلرم، هم قولونج و صانجى و محكمهلرده قونوشمه إقتدارسزلغى و هم مادام رسمًا وكيللرم اورادهدرلر، هم طبع ايدنلر ده اورادهدرلر؛ إستنابه صورتى ايله إفادهمڭ آلينمهسى ايچون فنّى و تهلكهلى خستهلغى وار شكلنده راپور ويريلمهسنى رجا ايدرم.
أميرطاغنده
سعيد النورسى
* * *