١٨/١١/١٩٥١
﴿بِاسْمِهٖ سُبْحَانَهُ ۞ وَاِنْ مِنْ شَىْءٍ اِلَّا يُسَبِّحُ بِحَمْدِهٖ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق قارداشلرم و معنوى مدرسة الزهرانڭ نور شاكردلرى!
بن إسپارطهيه گلديگم وقت، إسپارطهده إمام خطيب و واعظ مكتبنڭ آچيلاجغنى خبر آلدم. او مكتبه قيد اولاجق طلبهلرڭ أكثريسى نورجى اولمالرى مناسبتيله او مكتبڭ جوارنده غيرِ رسمى بر صورتده بر نور مدرسهسى آچيلوب، او مكتبى بر نوع مدرسۀِ نوريه ياپمق فكريله بر خاطره قلبمه گلدى. بر ايكى گون صوڭره گويا بر درس ويرهجگم دييه أطرافده شايع اولماسيله او درسمى ديڭلهمك ايچون رجال و نساء قافلهلرينڭ أطرافدن گلمهلريله آڭلاشيلدى كه، بويله نيمرسمى و عمومى بر مدرسۀِ نوريه آچيلسه او درجه قالابالق و تهاجم اولاجق كه، قابل اولميهجق. آفيونده محكمهيه گيتديگمز وقتكى گبى پك چوق لزومسز إجتماعلر اولمق إحتمالى بولونديغندن او خاطره ترك ايديلدى. قلبه بو ايكنجى حقيقت إخطار ايديلدى. حقيقت ده شودر:
هر بر آدم أگر خانهسنده درت بش چولوق چوجغى بولونسه كندى خانهسنى بر كوچك مدرسۀِ نوريهيه چويرسين. أگر يوقسه، يالڭز ايسه، چوق علاقهدار قومشولرندن اوچ درت ذات برلشسين و بو هيئت بولوندقلرى خانهيى كوچك بر مدرسۀِ نوريه إتّخاذ ايتسين. هيچ اولمازسه ايشلرى و وظيفهلرى اولماديغى وقتلرده، بش اون دقيقه دخى اولسه رسالۀِ نورى اوقومق ويا ديڭلهمك ويا يازمق جهتيله بر مقدار مشغول اولسهلر، حقيقى طلبۀِ علومڭ ثوابلرينه و شرفلرينه مظهر اولدقلرى