عزيز، صدّيق قارداشلرم!
أوّلا: حديثِ شريفڭ سرّيله رمضانِ شريفڭ نصفِ آخرنده، خصوصًا عشرِ آخرده، خصوصًا تك گيجهلرده، خصوصًا يگرمى يديسنده؛ سكسان كسور سنه بر عبادت عمرينى قزانديرهبيلن ليلۀِ قدرڭ إحياسنه و هر بريڭز عموم نور طلبهلريله برابر، خصوصًا بو بيچاره چوق قصورلى، خسته، ضعيف قارداشڭزى حصّهدار ايتمهڭزى و هر بريڭزڭ دعالرڭزڭ بيڭلر معنوى آمينلرڭ تأييديله درگاهِ إلٰهيده قبول اولماسنى رحمتِ إلٰهيهدن نياز ايدييورز.
ثانيًا: اونورسيتهدهكى گنج سعيدلرڭ حقيقةً مدرسة الزهرانڭ إستانبول و آنقرهدهكى وظيفهسنى ياپدقلرينه و بو بيچاره سعيده إحتياج بيراقمادقلرينه و رسالۀِ نورڭ هر بر جهتله كافى اولماسنڭ بر نمونهسى اولارق شيمدى سزه لفًّا گوندرديگمز، اونلرڭ مبعوثلره خطابًا يازدقلرى بياننامهلرينى و ينه اونلرڭ بر أثرى اولان تاريخچۀِ حياتڭ يتمش نسخهسنڭ باش طرفنه قويوب يتمش مبعوثه گوندرمهلرى ايچون بزه گلن بياننامهلرينى براىِ معلومات سزه گوندردك. سز مناسب گورسهڭز اونى و سزه أوّلجه گوندرديگمز صونغورڭ معارف وكالتنه مدافعهسى و مصطفى عثمانڭ عدليه وكيلنه إستدعاسيله برابر تاريخچۀِ حياته بر نوع ذيل اولارق أل يازمسيله ويا ماكينه ايله ويا اينهبوليدهكى يڭى حرفله أللى آلتمش نسخه تكثيرينى رأيڭزه حواله ايدييورز.
ثالثًا: مدرسة الزهرا أركانلرى، بنم شخصمڭ ده حقيقى وكيلمدرلر. بڭا، شخصمه گلن مكتوبلره اونلر، بنم بدلمه جواب ويرسينلر. خصوصًا خسروڭ مكتوبنده إسملرى بولونان ذاتلره قارشى مناسب جواب ويررسڭز. أحمد فيضىنڭ سزه قارشى يازديغى مكتوبڭ جوابنڭ پارچهسنى لفًّا سزه گوندرييورز.