إخبارِ غيبى نوعندن بر معجزۀِ نبويهيه إشارت ايله بر لمعۀِ إعجاز گوستروب او سورهيه عنكبوت نامى ويرمك و اونڭ أهمّيتسز آغينه أهمّيت ويرمك تام يرنده اولوب، بو آيته گلن شبهه و أوهاملرى أساسيله ردّ ايتديگنى گوردم. جنابِ حقّه حدسز شكر ايتدم كه، قرآنڭ سورهلرنده و آيتلرنده حتّى جملهلرنده و كلمهلرنده ده إعجاز لمعهلرى اولديغى گبى، حرفلرنده ده واردر بيلدم.
اَلْبَاقِى هُوَ الْبَاقِى
خسته قارداشڭز
سعيد النورسى
﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ اَبَدًا دَائِمًا﴾
عزيز، صدّيق، صارصيلماز، ثباتكار، فداكار قارداشلرم!
أوّلا: (وَ الْفَجْرِ وَ لَيَالٍ عَشْرٍ) ثناسنه مظهر او گيجهلريڭزى و بايرامڭزى روح و جانمله تبريك ايدرم. و شدّتلى خستهلغمڭ شفاسنه دعالريڭزى ايسترم.
ثانيًا: نورلرڭ پارلاق فتوحاتنه بر درجه ممانعت فكريله گيزلى دينسزلر بر قسم رسمى مأمورلرى آلَت ايدهرك كيفى قانونلرله ايليشييورلر. و خاص نورجيلرڭ آز بر قسمنه فتور ويرمك ايچون چاليشييورلر. أزجمله بو مبارك گونلرده إستانبولدن رهبر حقّنده دينسزلك طمارى ايله يازيلان (حاشيه) أهلِ وقوف راپورينى بڭا
___
(حاشيه): سزه براىِ معلومات بِالآخره گوندريلهجكدر.