كلّياتيله برابر (١٩٤٤) سنهسنده دڭزلى آغير جزا محكمهسنده متّفقًا برائت ويريلمش و يوكسك تمييز محكمهسى تصديق ايتمشدر. قضيۀِ محكمه حالنه گلمش و بتون أثرلر، مؤلّفِ محترمنه و صاحبلرينه إعاده ايديلمشدر. صوڭ آفيون محكمهسنده ده خلق پارتيسى حكومتنڭ قومونيست وكيلنڭ خصوصى أمرلريله ويرديگى غرضكار حكمى، قهرمان دموقراتلرڭ عدليه وكيلى، أسكى تمييز محكمهسنڭ عادل رئيسِ محترمى أساسندن نقض ايتمشدر. نهايت عفو قانونى ايله غدّارانه گيريشدكلرى و ايچندن چيقامدقلرى إفترا و إتهاملرڭ اوزرينه پرده چكمشلر و عفوله نتيجهلنديرمشلردر.
حقيقت بو مركزده ايكن و شيمدى أسكى حكومته بيڭلر حقارتلى نشرياتلر، بتون حرّيتله دوام ايدركن و درت يوز صحيفهلك غايت حق و حقيقتلى بر مجموعهنڭ ايكى صحيفهسنده بر آيتڭ تفسيرينى، غرض و بهانه ايله مدارِ مسئوليت ياپوب او مجموعهنڭ إمحا جهتنه گيديلمسى، طوغريدن طوغرىيه أسكى ظالم پارتى حسابنه شو مقصده معطوفدر كه: يوز بيڭلرله نور طلبهلرينى دموقراتلر عليهنه چويروب، دموقرات پارتيسنڭ سسسز، صداسز، گوستريشسز، فقط ديندارلقلريله غايت محكم بر إستنادگاهنى يوق ايتمك و دموقرات حكومتنى ييقمقدر. بو مدهش و شيطانى پلانڭ عقيم قالماسى ايچون ذاتِ عاليڭزه أهمّيتله إخبار ايدر و حرمتلريمزى عرض ايدرز.
اونورسيته نور طلبهلرى نامنه
يوسف ضيا آرون
* * *