﴿بِاسْمِهٖ سُبْحَانَهُ﴾
معظّم و خارقه رسالۀِ نور كلّياتندن ايكى بيوك مجموعهنڭ إمحا ايديلهجگى حقّنده دهشتلى بر خبر ايشيتدك. غايت حق و حقيقتلى و فيلسوفلرى إلزام ايدن او مجموعهلر، رسالۀِ نورڭ ديگر أجزالريله برابر دڭزلى و آنقره محكمهلرنده برائت ويريلوب قضيۀِ محكمه حالنه گلهرك إعاده ايديلديگى و ايكى دفعه تمييز محكمهسى برائت ايتديرديگى حالده و مصر، شام، حلب، مكّۀِ مكرّمه و مدينۀِ منوّره گبى عالمِ إسلامڭ مهمّ مركزلرنده فوق العاده بر تقدير و تحسينه مظهر اولان و مقبوليتنه حرمةً حضرتِ پيغمبر عليه الصلاة والسلامڭ قبرِ شريفى و حجر الأسود اوزرينه قونيلان بو أثرلر حقّندهكى بو مدهش معامله، خلق پارتيسنڭ ياپديغى ديگر عظيم جُرملرى گبى تاريخده أمثالى گورولمهمش بر جنايتدر. بز نور طلبهلرى او جبّار غدّارلردن حقّمزى قولايجه آلابيليردك. فقط إسلاميتڭ عصرلردر بايراقدارلغنى ياپان قهرمان تورك ملّتنڭ معصوم چولوق چوجق و إختيارلرينه قارشى رسالۀِ نورڭ بزلرده حصوله گتيرديگى قوّتلى شفقت إعتباريله و قرآنِ حكيمڭ بزلرى مادّى مجادلهدن منع ايدوب ألمزده طوپوز يرنده نور اولماسى حيثيتيله و بتون قوّتمزله مسلگمزڭ ايجابى اولان آسايشى تأمين ايتمك أساسيله، او ظالملره مادّةً مقابله ايدهمدك. يوقسه اللّٰه گوسترمسين، بر مجبوريتِ قطعيه اولورسه قومونيست و ماصونلر حسابنه اوڭا سببيت ويرنلر بيڭ دفعه پشيمان اولاجقلردر. هم بز مشاهداتمزله قطعى بر قناعتدهيز كه:
رسالۀِ نوره إلحاد و زندقه نامنه ايليشلديگى زمان، عمومى بر مصيبت گلييور. تعرّضڭ عين وقتنده درت دفعه بيوك زلزلهنڭ وقوعى و چوق حادثاتڭ عين وقتده ظهورى، بو قناعتمزى تصديق ايتمش. بو إعتبارله اويله بر قرارڭ إنفاذندن أهلِ ايمانڭ تيترهديگى، او خارق العاده و قيمتدار، مبارك مجموعهلر حقّنده إمحا جنايتنڭ ايشلنمهسى؛ بو ملّت و مملكت ايچنده معنوى زلزلهلر، فورطنهلر، طاعون و طوفانلر