﴿بِسْمِ اللّٰهِ الرَّحْمٰنِ الرَّحٖيمِ﴾
﴿اَلْحَمْدُ لِلّٰهِ رَبِّ الْعَالَمٖينَ وَالصَّلَاةُ وَالسَّلَامُ عَلٰى سَيِّدِنَا مُحَمَّدٍ وَعَلٰى اٰلِهٖ وَاَصْحَابِهٖ اَبَدًا دَائِمًا﴾
إشارات الإعجازڭ برنجى جزئى كه، تمامى يتمش جزء اولاجقدى. فقط رسالۀِ نور معنوى بر تفسيرِ قرآنى اولديغى ايچون ديدى: بو زمانده بڭا داها لزوم وار. اوتهكى جزءلر يرنده اونلر يازيلدى. أوت إشارات الإعجاز، عموم رسالۀِ نورڭ بر فهرستهسى، بر ليستهسى و او نور باغچهسنڭ بر فدانلغى و سرِّ إعجاز القرآنڭ بر منبعى اولديغى گورونويور. غايت اينجه و درين اولديغى ايچون شيمدىيه قدر عالملر پك آزينى آڭلامشلردى. فقط كيمڭ ألنه گچمش ايسه، فوق العاده تقدير ايتمش و أمثالسز ديمش. دهشتلى أسكى حرب ايچنده، آوجى خطّنده بعضًا ده آت اوزرنده ايجازدهكى إعجازڭ أڭ اينجه مناسباتنى گورمك و اونلرله تام مشغول اولمق و قوجه دهشتلى حربڭ تهلكهسى اونى مشوّش ايتمهمك و إنجماد درجهسندهكى صوغوقده آوجى خطّنده او اينجهجك إعجاز مناسبتلرينى هر شيدن داها أهمّيتلى گورمك، أسكى سعيدڭ حقيقةً خدمتِ قرآنيهده خارقه بر فداكارلغيدر. حتّى يڭى سعيدڭ اوتوز بش سنهده بو عجيب زمانده غزتهلرى اوقومامق و اون سنه ايكنجى حربى بيلمهمك، صورمامق و إعدام نيّتيله حپسلگنده، قرآن أسرارينى يازمقدن واز گچمهمك و بتون تهلكهلرى هيچه صايمغه نسبةً أسكى سعيدڭ او عجيب وضعيتنده او دهشتلره أهمّيت ويرمهدن إشارات الإعجاز نكتهلرينى يازديغى زمان گوسترديگى علمى و معنوى فداكارلغنى يڭى سعيدڭ بو اوتوز سنهدهكى فداكارلغندن داها خارقه گورويورز.