اوچنجيسى: بن اونلرڭ نظرنده رسالۀِ نور و شاكردلردهكى شخصِ معنويسنڭ ممثّلى و نمونهسى اولمام جهتيله، اونلرڭ سببِ تشويقلرى اولان او خارقه حسنِ ظنلرينى و قوّۀِ معنويهلرينى قيرمق، مصلحت دگلدر. او ايكيسنه و آرقداشلرينه، خصوصًا أحمد فيضى و دڭزلى حپسندهكى قارداشلريمزه و حقّمزده عدالته چاليشانلره بيڭلر سلام.
ثالثًا: چوق دفعه بنم صيقنتيلريمه بر مرهم حكمنه گچمش و يانمدهكى صاقلاديغم قهرمان خسروڭ چوق مكتوبلرى و اونلرڭ هر برندن برر أهمّيتلى فقرهيى آلوب مجموعنى لاحقهيه گچيرمك ايچون زمان بولامييورم. إن شاء اللّٰه بر إستراحت زماننده تدقيق ايدهجگم. أحمد نظيفڭ اينهبولى طلبهلرى نامنه يازديغى و خليل إبراهيمڭ آغلاتيجى مرثيهسنه إشتراكلرينى گوسترن مكتوبى، بنم او حواليدهكى ثباتكار قارداشلرم حقّنده أنديشهلريمى إزاله أيلدى. جنابِ حق اونلردن راضى اولسون.
رابعًا: چوبان عيسى كوينده أحمدڭ مكتوبنده إسملرى بولونان أسكى و يڭى قارداشلريمزڭ رسالۀِ نوره چاليشمهلرى و چوجقلرى ده قرآنه و نورلره چاليشديرمالرى، بو وقتده نورلره بيوك بر خدمتدر. جنابِ حق اونلرى موفّق أيلهسين، آمين!
خامسًا: منافق دشمنلريمڭ مادّى و معنوى زهرلرينه قارشى گرچه جوشن و أورادِ قدسيۀِ شاهِ نقشبند بنى ئولوم تهلكهسندن، بلكه يگرمى دفعه قدسيتلريله قورتارديلر؛ فقط مع التأسّف أعصابمده و سيڭيرلرمده و حسّاسيتمده، او ظلمدن اويله شدّتلى بر تأثّر، بر هيجان، بر تألّم، بر تنفّر گلمش كه؛ أڭ صميمى دوستمى و تام صادق بر قارداشمى بر ساعت يانمده تحمّل ايدهمييورم، روحم قالديرمييور. حتّى برى بڭا باقسه ده صيقيلييورم. أسكيده بنده برآز بولونان مَرْدُمْگريزلك خستهلغى،