هم إنسانلره كندينى بيلديرمك، بر شهرتپرستلك اولماسندن؛ بر أنانيت، بر خودفروشلق، بر رياكارلق إحتمالى وار. بو ايسه، بزم گبيلره تام ضرردر.
هم بن، مادام بو عصرده مادّةً و معنًا منفرد ياشامغه و حياتِ إجتماعيهدن چكيلمگه مجبور اولمشم؛ ألبته حقّم يوقدر كه، حياتِ إجتماعيهيى گچيرنلر ايچنده تاريخه بينوب إستقبالدهكيلره گورونهيم. يالڭز بو جهت وار كه؛ رسالۀِ نور، بو وطنه و بو ملّته پك بيوك منفعتى، محكمهلرڭ و أهلِ وقوفلرڭ متّفقًا قرارلريله تحقّق ايتمش. بو نقطۀِ نظرده، بنم أهمّيتسز، بيچاره، پريشان، چوق قصورلى شخصيتم دگل؛ بلكه يالڭز قرآنڭ مالى و مئالى اولان رسالۀِ نور نامنه، سزڭ سؤاللريڭزه جواب ايچون بن إشارتلر ايدرم، صوڭره ده رسالۀِ نور و شاكردلرى ايضاحله جواب ويرسينلر.
أوّلا: اوتوز سنه أوّلكى حياتمڭ تاريخچهسنى مرحوم عبد الرحمٰن يازمش، طبع ايديلمش.
ثانيًا: رسالۀِ نورڭ ظهور زماننڭ بر نوع تاريخچهسى أسكيشهر حپسنڭ مدافعهنامهسيله (يگرمى يدنجى لمعه اولمش) و دڭزلى حپسندهكى مدافعه رسالهلريله (اون برنجى و اون ايكنجى شعاع) «إختيارلر لمعهسى» و «آيتِ حسبيه رسالهسى» و «اون آلتنجى مكتوب»له «هجماتِ ستّه» و «إشاراتِ ثلاثه» و «إشاراتِ سبعه» رسالهلرى گبى نور أجزالرى، سؤاللريڭزه تفصيلاً جواب ويرمك ايچون محكمه بڭا إعاده ايتديگى و شيمدى أليمده بولونميان رسالهلر، بر زمان ألڭزه گلهجك. إن شاء اللّٰه سزى هيچ اونوتميهجغم. بو حالمده بو علاقهدارلغڭز، بنم چوق آغير صيقنتيلريمى خفيفلشديردى. اللّٰه سندن راضى اولسون، آمين!
* * *