و قسطمونيده مكتب گنجلرندن أڭ أوّل نورلره گيرن و آنقرهدهكى عبد الرحمٰنڭ اوغلى وحدتى حمايه و محافظهيه چاليشان آراجلى عبد اللّٰهڭ مكتوبنده تام ايمانلى و ديندارانه و مژدهكارانه يازماسى و اوراده اوقويوجيلرڭ چوق اولماسيله أللرندهكى رسالهنڭ كافى اولماديغنه و قونيهلى آرقداشى محمد ايله برابر گنجلر ايچريسنده نور نشر ايتمهلرى و آيدين طرفنده إن شاء اللّٰه بر أحمد فيضى حكمنده نورلرله غايت علاقهدار على آقطاغڭ گوزل و صميمى مكتوبندهكى دعالرى و توصيفلرى و نورڭ تأثيرلرينى حسّ ايتمهسى گبى فقرهلرڭ مئاللرى، بزى و نور دائرهسنى تماميله مسرور ايتديگى گبى، بو بايرامده ده بيوك بر معنوى هديه اولارق قبول ايدييورز. جنابِ حق اونلرڭ عمومندن راضى اولسون. خصوصى و آيرى آيرى مكتوب يازامديغمدن گوجنمهسينلر.
خسروڭ لايحۀِ تمييزه عائد مكتوبنى هيچ ايليشمهدن قبول ايتديگم ايچون، سزدهكى عين صورتنى محكمۀِ تمييزه گوندرهبيليرسڭز. مادام سزده بر صورتى واردر، بو مكتوبى گوندرمهدن لاحقهيه ده گچسين. شيمدى گلن مكتوبده گنجلك رهبرينڭ فيآتنى سز بندن داها ايى بيليرسڭز. بر ويا بر بچق بانقنوطدن آشاغى اولماسين. خسروڭ قلمى دردنجى سوزه باشلاماسنه بيڭ بارك اللّٰه ديرز. اللّٰه موفّق أيلهسين، آمين!
صفرانبولى قهرمانى بَرْبر حفظى؛ حسنى، ييلماز ايكى معصوم نورجى مخدوملريله و اينهبولى قهرمانلرندن على عثمان و ايكى نورجى مخدوملرينڭ بايرام تبريكلرينه مقابل سلام، هم موفّقيتلرينه دعا ايدرز.
* * *