قيرهجق، معصوم و مظلوم نورجيلرى قورتارهجق. فقط چوق دقّت و إحتياط لازمدر. رسالۀِ نور، دنياده هر جريانڭ فوقنده بولونماسى و عمومڭ مالى اولماسى جهتيله، بر طرفه تابع و داخل اولماز. بلكه متجاوز دينسزلره قارشى حقلى طرفه يارديمجى اولور و دوست اولور و إحتياط قوّتى حكمنده اونلره بر نقطۀِ إستناد اولور. فقط سياست حسابنه دگل؛ بلكه نورلرڭ إنتشارى و مصلحتى حسابنه بعض قارداشلر؛ نورلر نامنه دگل، بلكه كندى شخصلرى نامنه گيرهبيلير. خصوصًا مبارك إسپارطهنڭ شيمدىيه قدر نورلر مدرسهسى اولماسى و معارضلرڭ دخى اوڭا چوق ايليشمهمسى نقطهسنده، داخلده طرفگيرانه وضعيت آلمامق، معترضلرڭ ندامتنه و حقيقته دونمهلرينه بر وسيله اولابيلير. سز داها ايى بيليرسڭز.
صلاح الدّينڭ مكتوبى، بر قاچ جهتده أهمّيتليدر. آمريقا عالملرى، ألبته عصاىِ موسى رسالهسنه لاقيد قالميهجقلر. أگر دينى، دين ايچون سَون قسمنڭ أللرينه گچسه، فتوحات ياپار. يوقسه بعض أنانيتلى خواجهلريمز گبى، قيصقانجلق طماريله نشرينه و ترويجنه چاليشمهلرى مشكوكدر. هر نه ايسه.. عنايتِ إلٰهيهيه حوالهدر.
* * *
عزيز، صدّيق قارداشلرم!
أوّلا: طاهرينڭ إستانبوله گيتمسى، إن شاء اللّٰه خيردر. و خسروڭ پك چوق وظيفهلرينى تمامًا ياپماسى.. قناعتم گلدى كه؛ بارلاده بولونديغم زمان بتون يازانلرڭ تصحيحاتنى و تأليف خدمتنى ياپمامده تحقّق ايدن بيوك عنايت و خارقه موفّقيت، عينًا خسروده، يارديمجيلرنده دخى نمونهسى وار.