﴿بِاسْمِهٖ سُبْحَانَهُ﴾
﴿اَلسَّلَامُ عَلَيْكُمْ وَرَحْمَةُ اللّٰهِ وَبَرَكَاتُهُ﴾
عزيز، صدّيق، بختيار، وفاكار، فعّال، ثباتكار قارداشلرم!
أوّلا: تكرارًا هم سزڭ رجبِ شريفڭزى و ليلۀِ رغائبڭزى تبريك، هم صفرانبولىلى قارداشلريمزڭ تبريكلرينه مقابلةً شهورِ ثلاثهلرينى و درت ليالئِ مباركهلرينى و نورلرله غايت جدّى علاقهلرينى تبريك ايدرز. و اورانڭ شاكردلرى نامنه يازيلان تبريكنامه مكتوبنده بنم پك چوق قصورلى شخصمه ويردكلرى عنوانلرى و ثنالرى، خليل إبراهيمڭ بعض مكتوبلرى گبى، تعديل ايله «رسالۀِ نور»ه چويروب لاحقهيه گيرمهسنى ايستدم. فقط شخصم پك صريح بر طرزده موضوع ياپيلديغى ايچون ياقيشديرامدم، شيمديلك گرى قالدى.
قارداشلرم! قطعيًا بيليڭز: شان و شرف و خودفروشلق و كندينه گوونمك و شخصمى بگنديرمكدن اوركويورم و قاچييورم و شخصمه قارشى مدحلردن خوشلانمييورم. يالڭز رسالۀِ نوره قارشى صداقت و قناعته بر أماره اولمق جهتيله، بعض مفرطانه تعبيرلرى، يا خاطرلرى ايچون ويا حسنِ ظنلرينى قيرمامق فكريله قسمًا تعديل ايله قبول و سكوت ايدرم. فقط ايكى إخلاص لمعهلرى و مسلگمزڭ «خلّت» و «إخلاص» و «اخوّت» أساسلرى، بو طرز مدحلره مساعده ايتمز. هم بو بنلك و أنانيت عصرنده و شهرتپرستلرڭ نظرنده نورلرڭ صافيتنه و خالصيتنه ضرر ويرهبيلير.
ثانيًا: حفظينڭ ايكى معصومنڭ يازدقلرى عصاىِ موسى و رهبر و كوچك سوزلر بزى مسرور أيلدى. يوز ما شاء اللّٰه. بويله بيڭلر نورجى معصوملر، إستقبالى نورلانديرهجقلر.
سعيد النورسى
* * *