عزيز قارداشلريمه برر برر سلام ايدييورم. قسطمونى و جوارندهكى قارداشلريمى ده (أسكى زمانده اولديغى گبى) دائما برابر گورويورم. هيچ مراق ايتمهسينلر؛ رسالۀِ النور توقّف ايتمييور، پرده آلتنده بيوك فتوحاتى وار. صيقنتيلريمزڭ نتيجهلرى، رسالۀِ النورڭ درسلرينه داها زياده نظرِ دقّتى جلب ايدوب گنيش بر دائرهده كندينى اوقوتديرييور. اونڭ ايچون غايت چاليشقان ايكى قارداشمز اولان بابا و اوغلى؛ (حاشيه) و باباسى زياده صيقنتى چكمهلرنده إفتخار ايتسينلر، اوراده موقّت توقّفدن متأثّر اولماسينلر. بنم و بزم نظريمزده اونلر، أسكى موقعلرينى تام محافظه ايدييورلر.
باشده رسالۀِ النورڭ فطرى طلبهلرى معصوم چوجقلر ديمشدك. ايشته بر نمونهسى؛ بو مكتوبمى راحتسزلقدن كندم يازاماديغم ايچون بن سويلهيوب يڭى حروفله يازان جيلان، برى ده اوڭا مكتوب يازان معصوم كوچك على، برى ده بو دفعه بڭا كاملانه و مدقّقانه مكتوب يازان مدرسۀِ نوريهنڭ كوچك شاكردى كوچك محمددر. بن ده اونلره «بارك اللّٰه بختيار چوجقلر» ديرم، پدر و والدهلرينى ده تبريك ايدرم.
* * *
___
(حاشيه): بو ذاته بنم طرفمدن يازيڭز كه: رسالۀِ النورڭ مصلحتى صبر و تحمّل و تمكين إقتضا ايدييور و عصبيت و حدّتى قبول ايتمييور. و معارضلريله دگل اوغراشمق، اونلرى دوشونمييور، أهمّيت ويرمييور. و صيقنتيلرله نتيجه إعتباريله مفرّح اولونور. اونڭ ايچون او قارداشمز تحمّلده بنى تقليد ايتسين. بن أڭ ضعيفڭز اولديغم حالده اوندن اون درجه داها زياده صيقنتى چكديگم حالده، كمالِ سرور ايله شكر ايدوب شكوا ايتمييورم. (عَسٰى اَنْ تَكْرَهُوا شَيْئًا وَ هُوَ خَيْرٌ لَكُمْ) آيتى هر وقت سرّينى گوسترييور.